詩篇 5 - 現代台語譯本漢字版(TTVH)-闽南语

大闢的詩，交互聖樂長；用歕的樂器伴奏。祈求保護的早禱

1上主啊，求你聽我講，

知我的苦情。

2我的王，我的上帝啊，

求你聽我求叫的聲，因為我對你祈禱。

3上主啊，早起時求你聽我的聲；

早起時我對你懇求，閣聽候。

4因為你毋是意愛罪惡的上帝；

邪惡，你𣍐容允。

5驕傲的人𣍐當徛佇你面前；

做歹的人攏是你所怨恨。

6講白賊的，你欲滅𪜶；

刣人及奸詐的，攏是上主所厭惡。

7毋拘因為你豐盛的慈愛，我會當入你的殿，

心存敬畏，佇你的聖殿敬拜。

8上主啊，對敵啲當等我，

求你照你的公義，導我行正直的路。

9𪜶的嘴無老實，

𪜶的心惡毒滿滿，

𪜶的嚨喉是開開的墓，

𪜶的舌𠢕扶挺。

10上帝啊，求你定𪜶的罪，

互𪜶陷落家己的計謀；

因為𪜶背叛你，罪過真重，

求你給𪜶趕出。

11所有尋你做避難所的，求你互𪜶歡喜，

互𪜶歡喜出聲無停，因為你庇祐𪜶。

願許個意愛你的名的人攏因為你歡喜快樂。

12上主啊，你欲賜福互義人；

你欲用恩惠，親像盾牌四面圍𪜶。