耶利米書 19 - 現代台語譯本漢字版(TTVH)-闽南语

1上主按呢講：「你著去給燒瓷人買瓷瓶，閣導人民中間的長老及祭司中間受尊重的，

2過哈珥西門，去欣嫩子山谷，佇遐宣布我吩咐你的話，

3講：『猶大君王及耶路撒冷的住民，著聽上主的話！上主 — 萬軍的統帥、以色列的上帝按呢講：看咧，我欲降災禍佇此個所在，互聽著的人攏驚一趒。

4因為𪜶及𪜶的列祖，以及猶大君王攏棄拺我，給𪜶毋識的神明燒香，互此個所在變做外邦人的地，一四界攏是無辜的人的血。

5𪜶閣為著巴力起山頭壇，將𪜶的子兒做燒化祭獻互巴力。我毋曾命令𪜶做此款代誌，毋曾提起，連想都毋曾想過。

6恁著知，時日一下到，此個所在𣍐閣叫做陀斐特抑是欣嫩子山谷，欲叫做屠殺的山谷。上主按呢宣告。

7我欲佇遮互猶大及耶路撒冷人民的計謀落空，嘛欲互𪜶的對敵刣贏，互𪜶死佇數想𪜶性命的人的手；𪜶的屍體會成做空中的飛鳥及地上的野獸的食物。

8我欲互此個城成做通驚惶，互人恥笑的對象；對遮經過的人會因為𪜶所抵著的災禍著驚，給𪜶恥笑。

9對敵，就是數想𪜶性命的人，會來包圍此個城，給𪜶迫甲𪜶著食家己的子、查某子，以及𪜶的朋友的肉。』

10「你講煞，著給彼個瓷瓶摔破，互及你做夥去的人親目看著，

11閣給𪜶講：『上主 — 萬軍的統帥按呢講：我欲拍此個城及諸個人民，親像給燒瓷人的瓷器摔破，破甲𣍐補得。人欲佇陀斐特埋葬死人，埋甲無所在通埋。

12上主講：我欲按呢對待此個所在及遮的住民，互此個城及陀斐特仝款。

13耶路撒冷的厝以及猶大君王的宮殿嘛會及陀斐特仝款受拍垃墋，因為𪜶佇厝頂給天頂的萬象燒香，向別個神明獻奠酒祭。』」

14 耶利米對上主差伊去傳達命令的陀斐特倒來，徛佇上主聖殿的埕，對人民講：

15「上主 — 萬軍的統帥、以色列的上帝按呢講：看咧，我欲降災禍互此個城及伊周圍的城鎮，因為許個住民硬心固執，毋肯聽我的話。」