何西阿書 9 - 現代台語譯本漢字版(TTVH)-闽南语

以色列應該受的刑罰

1 以色列啊，毋通親像外族人歡喜慶祝，

因為恁行淫亂離開上帝，

佇逐個五穀場收行淫賺的錢。

2五穀場及酒窟𣍐當養飼恁；

所期待的新酒嘛會落空。

3 以法蓮𣍐當閣住佇上主的地；

𪜶會倒轉去埃及，

佇亞述食無清氣的物。

4𪜶𣍐當閣向上主獻奠酒祭；

𪜶獻的祭𣍐互伊歡喜。

𪜶的祭物親像互喪家食的物，

食的人變做無清氣。

𪜶的食物只有會當互𪜶止飢，

𣍐用得提入去上主的殿。

5佇所定的節期，敬拜上主的日，

恁欲做什麼？

6𪜶雖然閃過災難，

嘛會互埃及圍困殺害，

佇孟斐斯互人收屍埋葬。

𪜶的金銀財寶會互雜草蓋密；

𪜶住的所在莿滿四界。

7著互以色列知，

刑罰的日來啦，

報應的時到啦。

恁的罪重，充滿怨恨，

所以恁講：「先知是戇人，

受神感動的是𤞚人。」

8先知受上帝指派做以色列的守望者；

伊無論去叨位攏有羅網啲當等，

連佇上帝的家都受敵視。

9 以色列徹底腐敗，

親像𪜶早前佇基比亞的所做。

上帝會記得𪜶的罪，

欲刑罰𪜶的罪過。

以色列的罪及後果

10上主講：

「頭一遍，我抵著以色列，親像佇曠野看著葡萄；

我抵著恁的列祖，親像看著頭一季初熟的無花果。

毋拘𪜶一下到巴力‧比珥，就開始去拜彼所在可惡的神明，

𪜶就變做及𪜶所愛的神明像款赫呢通厭惡。

11 以法蓮的榮光會親像鳥飛去，

親像婦仁人𣍐受胎，𣍐懷孕，𣍐生子。

12𪜶若會生，

我嘛欲互許個囝仔飼𣍐大，無留半個。

我若放拺𪜶，𪜶就悽慘。

13我看，以色列的子兒註定著互人追趇殘殺；

以法蓮會導𪜶的子兒出來交互屠殺者。」

14上主啊，你欲互𪜶什麼？

著互𪜶流產，奶焦去。

上主審判以色列

15 以色列佇吉甲做盡歹代，

我佇遐開始怨恨𪜶。

因為𪜶所做的歹，我欲對我的家給𪜶趕出去；

我𣍐閣疼惜𪜶；

𪜶的首領嘛攏背叛我。

16 以法蓮受拍倒；

𪜶的根焦去，𣍐結果子。

𪜶若生子，

所生的寶貝仔子，我嘛欲給刣死。

17我的上帝一定欲給𪜶棄拺，因為𪜶毋聽趁伊。

𪜶會佇列國中流浪。