彌迦書 4 - 現代台語譯本漢字版(TTVH)-闽南语

永遠的和平(賽 2.2-4)

1佇將來的日子，

上主聖殿的山會堅立佇眾山的頂面，

比攏總的山嶺較高；

萬民攏會溢倚來歸伊。

2萬國會來，講：

「咱來上上主的山，

來去雅各的上帝的殿。

伊會用伊的道路教示咱，

互咱通行伊的路。」

律法會對錫安發出；

上主的話會對耶路撒冷傳開。

3伊會佇萬民中施行審判，

為遠遠的強國排解紛爭；

𪜶會將刀拍做犁頭，

將槍拍做鐮刀；

此國𣍐閣攑刀攻擊彼國，

嘛免閣學戰爭。

4逐個人攏坐佇家己的葡萄樹腳及無花果樹腳，

無人會給𪜶拍青驚；

這是上主 — 萬軍的統帥親嘴講的。

5雖然萬民攏靠家己神明的名生活，

毋拘阮欲奉上主 — 阮的上帝的名行踏，直到永永遠遠。

以色列人歸回本國

6上主講：

「佇彼日，我欲聚集腳跛的，

招集受放逐的，

及我曾互𪜶受苦的。

7我欲互腳跛的成做所賰的子民，

互受放逐的成做強國。

上主欲佇錫安山作王治理𪜶，

對此時到永遠。」

8 耶路撒冷啊，錫安城的堡壘啊，

你做羊群的守望台，

早前的主權欲閣歸互你，

王權欲回復互你。

9你是按怎啲大聲哀哭？

是因為你無王，大臣死了了，

你才親像產婦催陣痛苦是無？

10 錫安的子民啊，你會親像產婦催陣痛苦，

因為你會離開此個城去住佇野外，去到巴比倫，

毋拘你會佇遐得著解救。

上主欲對對敵的手中給你贖回。

11現在真多國家已經聯合起來欲攻擊你。

𪜶講：著互錫安受凌辱，

咱通親目看著。

12毋拘𪜶毋知上主的心意，

無明白伊的計劃；

伊已經給𪜶聚集起來，

親像收集麥捆佇五穀場。

13上主講：錫安的子民啊，起來碖五穀。

我欲互你鐵的角，銅的腳蹄，通拍碎列國，

將𪜶所搶的物提來獻互我，

將𪜶的財物獻互普天下的主。