士師記 7 - 現代台語譯本漢字版(TTVH)-闽南语

基甸拍敗米甸人

1 耶路巴力，就是基甸，及所有隨伊的人透早起來，佇哈律水泉邊紮營；米甸人佇𪜶的北旁，倚近摩利山的山谷紮營。

2上主對基甸講：「隨你的人傷多，我𣍐當將米甸人交佇恁的手，才免以色列人對我誇口，講：『是阮靠家己刣贏的。』

3你著對人民宣布：『若有人驚死，通離開基列山倒去。』」按呢，就有兩萬兩千人倒去，猶賰一萬人。

4上主對基甸講：「人猶傷多。你著導𪜶落去到水邊，我欲佇遐為著你揀一寡人。我給你講叨一個人通及你去，彼個人就會當及你去；我給你講叨一個毋通去，彼個人就毋通及你去。」

5基甸就導人民去到水邊；上主對基甸講：「許個親像狗用舌舐水的人，徛一旁；跪落去飲水的人，徛另外一旁。」

6用手捧水起來舐的，有三百人；其他許個攏跪落去飲水。

7上主給基甸講：「我欲用諸個捧水起來舐的三百人解救恁，將米甸人交佇你的手；其他的人攏通倒去𪜶兜。」

8按呢，留落來彼三百人對其他的人接糧食及哨角；基甸就解散其他的以色列人，互𪜶倒去𪜶兜。米甸人紮營佇以色列人下面的山谷。

9彼暝，上主給基甸講：「起來，落去攻打彼個兵營，因為我已經將𪜶交佇你的手。

10你若毋敢進攻，你及你的僕人普拉著落去𪜶的兵營，

11注意聽𪜶啲講什麼，就有膽量落去攻擊。」伊就及伊的僕人普拉落去武裝部隊的營邊。

12歸個山谷攏是米甸人、亞瑪力人，及東旁的部族，𪜶親像草蜢赫多；𪜶的駱駝親像海邊的沙算𣍐了。

13 基甸到的時，有一個米甸的兵仔給伊的同伴講伊的夢，講：「我夢見一個夢。我看著一個大麥餅翱入米甸的兵營，給一個布棚挵倒，布棚反輾轉，倒甲平平。」

14伊的同伴應講：「這一定是以色列人約阿施的子基甸的刀；上帝已經將米甸人及全軍交佇伊的手。」

15 基甸聽著彼個人的夢及解說，就跪拜上帝。伊倒來以色列人的兵營，喝講：「起來！上主已經將米甸的軍隊交佇恁的手啦。」

16伊就將彼三百人分做三隊，將哨角及空甕仔交互𪜶逐個人，甕仔內囥火把。

17伊給𪜶講：「恁著看我按怎做。我到營邊的時按怎做，恁著照按呢做。

18我及許個及我做夥去的人歕哨角的時，恁著佇營的四圍歕哨角，閣喝：『為上主，為基甸！』」

19佇半暝以前，衛兵抵仔換班了後，基甸及隨伊的一百人來到營邊。𪜶就歕哨角，摃破手裡的甕仔；

20三隊的人攏歕哨角，摃破甕仔，倒手攑火把，正手攑哨角；𪜶大聲喝講：「為上主攑刀，為基甸攑刀。」

21𪜶佇兵營的四圍，逐個人徛佇家己的所在；全營的敵軍那喝那逃走。

22彼三百個人歕哨角的時，上主互米甸全營的人互相刣來刣去。全營的人攏逃走去西利拉的伯‧示他，一直到倚近他巴的亞伯‧米何拉。

23 以色列人對拿弗他利、亞設，及瑪拿西所有的地區聚集，來追趇米甸人。

24基甸派使者到以法蓮山區逐所在，講：「恁落來追趇米甸人，顧守約旦河的渡口，一直到伯‧巴拉，防止米甸人過河。」對按呢，以法蓮人就聚集，顧守約旦河渡口，直到伯‧巴拉。

25𪜶掠著米甸兩個領袖，俄立及西伊伯，佇俄立的石磐刣俄立，佇西伊伯的酒窟刣西伊伯；𪜶閣追趇米甸人，將俄立及西伊伯的頭殼帶去約旦河東旁，交互基甸。