耶利米書 40 - 現代台語譯本漢字版(TTVH)-闽南语

耶利米及基大利做夥

1 巴比倫王的侍衛長尼布撒拉旦佇拉瑪給耶利米放出去以後，上主有對耶利米講話。耶利米互人用鍊仔鍊啲，及許個耶路撒冷人，以及猶大人做夥欲互人掠去巴比倫。

2 尼布撒拉旦叫耶利米來，對伊講：「上主 — 你的上帝曾警告欲降災禍互此個所在。

3今，上主果然照伊所講的做。這是因為恁得罪上主，無聽趁伊的話，諸個代誌才會臨到恁。

4今我將鍊佇你的手的鍊仔剝起來。你若看及我做夥去巴比倫好，就來去，我會好好仔給你照顧；若無愛去，就毋免去。你看，土地即闊，你愛去叨位，就通去。」

5 耶利米猶未離開以前，尼布撒拉旦閣給伊講：「你嘛會用得倒去沙番的孫，亞希甘的子基大利遐；巴比倫王已經指派伊治理猶大逐城鎮。你通住佇恁的同胞中間。抑是，你看叨位較抵好，就通去遐。」侍衛長就送禮物及糧食互耶利米，互伊自由離開。

6耶利米就去米斯巴，去亞希甘的子基大利遐，及伊做夥住佇賰落來的同胞中間。

基大利受指派做省長(王下 25.22-24)

7佇野外，許個無投降巴比倫的軍官及𪜶的部下，聽著巴比倫王指派亞希甘的子基大利做彼地區的省長，治理無掠去巴比倫的查甫人、查某人、囝仔，及彼所在非常散赤的人，

8就來米斯巴見基大利。諸個軍官包括尼探雅的子以實瑪利、加利亞的子約哈難及約拿單、單戶默的子西萊雅、尼陀法人以斐的子兒、瑪迦人耶撒尼亞，以及𪜶的部下。

9沙番的孫，亞希甘的子基大利對許個軍官及𪜶的部下咒誓，講：「毋免驚服事巴比倫人。做恁住𫢶此個所在，互巴比倫王管，恁就會平安無事。

10我咧，我會住佇米斯巴，侍候許個來咱遮的巴比倫人。毋拘恁，恁著積聚一寡酒、油，及熱天的果子，收𫢶器具內面，閣住佇恁佔的城鎮。」

11許個佇摩押、亞捫、以東地區，及逐國的猶大人，聽著巴比倫王無剿滅所有的猶大人，閣派沙番的孫，亞希甘的子基大利做省長，

12𪜶就對互人趕去的逐所在轉來，來猶大地的米斯巴，去基大利遐。𪜶攏有收囥真多酒及熱天的果子。

基大利受暗殺(王下 25.25-26)

13 加利亞的子約哈難及許個佇野外的軍官來米斯巴見基大利，

14對伊講：「亞捫王巴利斯有派尼探雅的子以實瑪利來欲刣你，你豈知？」亞希甘的子基大利毋信𪜶的話。

15加利亞的子約哈難佇米斯巴私下對基大利講：「請允准我去刣尼探雅的子以實瑪利，一定無人會知影此個代誌。哪通互伊給你刣死。你若死，所有歸倚來你遮的猶大人就會四散，賰落來的猶大人豈毋是攏會滅亡？」

16亞希甘的子基大利給加利亞的子約哈難講：「你毋通做此款代誌。你所講關係以實瑪利的話無影。」