出埃及記 34 - 現代台語譯本漢字版(TTVH)-闽南语

重造石版(申 10.1-5)

1上主對摩西講：「你著拍兩塊及以前仝款的石版；你以前摔破的石版頂面的話，我欲閣寫佇此兩塊石版頂面。

2明仔早起你著準備好勢；透早上西奈山，佇上高的所在朝見我。

3毋通有人及你做夥來；歸座山毋通有人，山腳嘛毋通有牛群羊群佇遐食草。」

4摩西就拍兩塊及以前仝款的石版。摩西透早起來，照上主的吩咐，手提兩塊石版上西奈山。

5上主佇雲中降臨，及摩西徛做夥，宣布上主的名。

6上主對摩西的面前經過，宣布講：

「上主，上主，

有仁慈恩典的上帝，

無快受氣，閣有豐盛的慈愛及信實；

7持守慈愛到千萬代，

赦免罪孽、過失，及罪過；

一定𣍐給有罪的判做無罪，

欲追究人的罪，對父到子，到三四代。」

8 摩西就隨時仆落土腳敬拜，講：

9「主啊，我若對你得著恩典，主啊，求你及阮做夥行。阮是心硬固執的民族，求你赦免阮的罪孽及罪過，接納阮做你的子民。」

重新立約(出 23.14-19；申 7.1-5；16.1-17)

10上主講：「今，我欲及你立約。我欲佇你全體人民的面前做奇妙的事，是佇天下萬族的中間猶毋曾做過的。按呢，你周圍的民族就欲看見上主通過你所做的事是偌呢通驚畏。

11我今仔日所命令你的，你著遵守。我欲對你的面前趕出亞摩利人、迦南人、赫人、比利洗人、希未人，及耶布斯人。

12你著謹慎，毋通及你欲去彼個所在的住民立約，才免𪜶成做害恁的羅網。

13你著拆毀𪜶的祭壇，摃碎𪜶的石柱像，剉斷𪜶的亞舍拉女神的神像。

14「毋通敬拜別個神明，因為上主是要求人全情服事伊的上帝，無容允有別個神明及伊比並。

15所以，你𣍐用得及彼所在的住民立約，才免𪜶服事𪜶的神明行邪淫，獻祭互𪜶的神明的時，你受邀請，就去食𪜶的祭物；

16才免互你的後生娶𪜶的查某子，佇𪜶的查某子服事𪜶的神明行邪淫的時，引誘你的後生做夥服事𪜶的神明行邪淫。

17「你毋通為家己鑄造神像。

18「你著守除酵節，照我的命令，佇亞筆月所指定的日期，食無酵餅七日久，因為你佇亞筆月出埃及。

19「所有頭上生的攏是我的；無論是牛、羊，頭上生的公的攏是我的。

20頭上生的驢仔，著用羊仔贖回；若無欲贖回，就著摃斷驢仔的頷頸。恁的大子攏著贖回。

「你毋通空手來敬拜我。

21「六日內著做工，第七日著歇睏；栽種收割的時嘛著按呢。

22「初熟的小麥收成的時，著守七七收割節。閣著佇年尾守收囥節。

23「恁所有的查甫人，著一年三遍來敬拜至高的上主 — 以色列的上帝。

24我欲對你的面前將外族人趕出去，擴展你的領土；你一年三遍來見上主 — 你的上帝的時，一定無人會侵犯你的土地。

25「毋通將牲禮的血及有酵的物做夥獻互我；𨃟過節的祭物嘛毋通留到隔早起。

26「土地頭水上好的收成，著送到上主 — 你的上帝的厝。

「毋通用山羊母的奶煮伊的子。」

27上主對摩西講：「你著將諸個話寫起來，因為我是照諸個話及你以及以色列人立約。」

28摩西及上主佇遐四十暝日，無食飯無飲水。伊將此個約的話，就是十條誡，寫佇彼兩塊石版。

摩西落西奈山

29 摩西落西奈山的時，手提彼兩塊約版；因為上主有及伊講話，伊的面發光，毋拘伊家己毋知。

30亞倫及以色列眾人看著摩西，看咧，伊的面發光；𪜶就真驚，毋敢倚近伊。

31摩西叫𪜶來，亞倫及會眾的領袖才攏倒轉去伊遐；摩西就及𪜶講話。

32然後以色列眾人攏進前倚來；摩西就將上主佇西奈山對伊講一切的話，攏吩咐𪜶。

33摩西及𪜶講話了後，就用帕罩面。

34毋拘摩西入去見上主及上主講話的時，面帕就提起來，到伊出來。伊出來，就將上主所吩咐的給以色列人講。

35以色列人看著摩西的面發光；摩西用帕罩面，聽候到伊入去及上主講話才提起來。