民數記 9 - 現代台語譯本漢字版(TTVH)-闽南语

佇西奈山守𨃟過節

1出埃及第二年正月，上主佇西奈的曠野命令摩西講：

2「以色列人著佇指定的日期守𨃟過節；

3就是佇此個月的十四，照指定的時間，對黃昏的時起，照所有的規例及命令遵守。」

4摩西就命令以色列人守𨃟過節。

5正月十四黃昏的時，𪜶就佇西奈的曠野守𨃟過節。所有上主命令摩西的，以色列人攏照按呢做。

6有一寡人因為摸著人的屍體成做無清氣，𣍐當佇彼日守𨃟過節；彼日𪜶去見摩西及亞倫，

7講：「阮因為摸著屍體成做無清氣，是按怎就𣍐用得佇指定的時間，及以色列人做夥獻禮物互上主？」

8 摩西給𪜶講：「恁𫢶遮等一下，我欲聽上主對恁有什麼指示。」

9上主命令摩西

10著對以色列人宣布：「恁抑是恁的後代若有人互屍體沐垃墋，抑是出外去遠遠的所在，猶原著守上主的𨃟過節。

11𪜶著慢一個月，佇二月十四黃昏的時守節，食羊羔、無酵餅，及苦菜，

12連一點仔都毋通留到隔早起，羊仔的骨連一支嘛毋通拍斷。𪜶著照𨃟過節所有的規例守此個節。

13若有人是清氣嘛無出外，毋拘無守𨃟過節，著給伊對人民的中間革出，因為伊佇指定的日無獻禮物互上主，伊著對家己的罪負責任。

14「若有外族人寄居佇恁中間，愛欲守上主的𨃟過節，伊著遵守𨃟過節的規例及命令；出外人及本地人攏著遵守仝一個規例。」

雲遮蓋會幕(出 40.34-38)

15搭會幕彼日，有雲遮蓋會幕，就是約櫃的帳幕；對黃昏到早起，有看起來親像火的雲蓋佇會幕頂面。

16雲不時遮蓋會幕，暝時看起來親像火。

17雲什麼時對會幕升高，以色列人就出發；雲停佇什麼所在，以色列人就佇遐紮營。

18以色列人照上主的命令起行，嘛照上主的命令紮營；雲停佇會幕頂偌久，𪜶就佇遐紮營赫久。

19雲佇會幕頂停多多日，以色列人就照上主的命令無起行。

20有時雲佇會幕頂停無幾日，𪜶照上主的命令猶原停留佇遐，嘛照上主的命令起行。

21有時雲對下昏到早起遮啲，隔早起雲一下升高，𪜶就出發；無論日時抑是暝時雲升高，𪜶就出發。

22雲停佇會幕頂面，無論是兩日、是一月日、是一年，以色列人猶原停留佇遐，無起行；毋拘雲一下升高，𪜶就起行。

23𪜶照上主的命令紮營，嘛照上主的命令起行；𪜶攏照上主通過摩西的指示，遵守上主的命令。