1我曾講：「我欲謹慎我的言行，
才免我的舌犯罪；
歹人佇我面前的時，
我欲用嘴罨約束家己的嘴舌。」
2我恬恬無出聲，
連好話都無講出嘴；
我的痛苦就愈加添。
3我內心一直燒起來，
我愈想火愈𤏸，
我就開嘴講：
4「上主啊，求你互我知家己的結局，
家己的年歲有偌多，
互我知家己的性命真緊就無去。
5「你互我的日子實在真短；
我的歲壽對你看起來差不多是無；
人不過是一個氣。
6人啲活親像影；
𪜶無閒吱吱實在無採工；
𪜶所積聚的毋知啥人會得去。
7「主啊，今我著聽候什麼？
我的向望在佇你。
8求你救我脫離我一切的過失，
互我免受戇人的凌辱。
9因為是你互我受苦，
我靜靜無開嘴。
10你互我的責罰，求你給我除去；
因為你的手的督責，我啲欲消滅。
11你責罰人，因為𪜶犯罪；
你互𪜶所意愛的親像著蛀蟲灰去。
人不過是一個氣。
12「上主啊，求你聽我的祈禱，
俯耳孔聽我的懇求；
我流目屎，求你毋通無出聲。
我是依倚你的出外人，
及我的列祖像款是寄居的。
13求你寬容我，
互我猶未死以前得著歡喜快樂。」
Who We AreWhat We EelieveWhat We Do
2025 by iamachristian.org,Inc All rights reserved.
