1總是彼個曾受過痛苦的地𣍐閣再有烏暗。
未來的君王以前，西布倫的地及拿弗他利的地受看輕，毋拘將來此個地區，沿地中海的路，到約旦河外，甚至到外族的加利利，攏會得著榮光。
2行佇烏暗中的人
已經看見大光；
生活佇死蔭的地的人
有光啲照𪜶。
3你互𪜶的國家強盛，
互𪜶大歡喜。
𪜶佇你的面前歡喜快樂，
親像啲收割的歡喜，
親像啲分戰利品的快樂。
4因為你有拍碎𪜶啲背的軛，
摃斷𪜶肩頭頂的棍，
遏折壓迫者的鞭，
親像你毀滅米甸的軍隊彼日。
5戰士佇交戰中穿的軍鞋，
滒著血的軍服，
攏會做柴燒。
6因為有一個嬰仔已經為著咱出世，
有一個子賜互咱。
伊欲負擔國政；
伊的名欲稱做：
賢明的導師，
全能的上帝，
永在的天父，
和平的君王。
7伊的主權無窮；
伊的和平無盡。
伊欲坐大闢的寶座，
繼承伊的王國。
伊欲用公平正義互國穩固堅立，
對此時直到永遠。
上主 — 萬軍的統帥的熱誠一定會成全此個事。
上主欲刑罰以色列8主有宣告欲攻擊以色列王國；
此個審判欲降落佇雅各的後代。
9所有以法蓮的人民及撒馬利亞的住民攏知，
毋拘𪜶猶自高驕傲，講：
10「磚仔厝已經倒落去，
阮欲用拍好的石重起。
桑材樹已經互人剉了，
阮會用柏香樹代替。」
11所以上主激𪜶的敵人利汛王
起來攻擊以色列。
12東有敘利亞人，西有非利士人，
𪜶攏開大嘴欲吞食以色列。
雖然是按呢，上主的受氣猶未煞；
伊的手猶伸長長欲處罰𪜶。
13毋拘，人民無悔改歸向拍𪜶的上主，
嘛無尋求上主 — 萬軍的統帥。
14所以，上主欲將以色列的頭及尾溜
— 棕樹枝及蘆葦 —
佇一日內攏斬斷。
15長老及有地位的人就是頭；
用白賊教人的先知是尾溜。
16諸個領袖導此個子民行毋著的路；
互𪜶導的人攏受吞滅。
17所以，主無欲憐憫𪜶的少年人，
嘛無欲疼惜𪜶的孤兒寡婦；
因為所有的人攏無法無天，
逐個嘴講的話攏是邪惡。
雖然是按呢，上主的受氣猶未煞；
伊的手猶伸長長欲處罰𪜶。
18邪惡親像火啲燒，
吞滅莿野草；
火佇艷艷的樹林啲𤏸，
火燻若雲柱直直淐高。
19因為上主 — 萬軍的統帥的大受氣，
土地燒甲焦焦焦；
人民攏親像吞滅人的火，
給家己的兄弟燒甲賰無半個。
20人民正旁搶，猶啲枵，
倒旁吞食，猶食𣍐飽；
逐個人攏食家己子兒的肉。
21 瑪拿西吞以法蓮，
以法蓮食瑪拿西；
𪜶聯合攻擊猶大。
雖然是按呢，上主的受氣猶未煞；
伊的手猶伸長長欲處罰𪜶。
Who We AreWhat We EelieveWhat We Do
2025 by iamachristian.org,Inc All rights reserved.
