耶利米書 44 - 現代台語譯本漢字版(TTVH)-闽南语

拜偶像的後果

1下面是關係住佇埃及的密奪、答比匿、孟斐斯、巴特羅地區所有的猶大人，上主對先知耶利米講的話：

2「上主 — 萬軍的統帥、以色列的上帝按呢講：『恁有看著我降互耶路撒冷及猶大逐城鎮一切的災禍。今諸個城鎮已經攏拋荒，無人住。

3這是因為𪜶有做邪惡的事，惹我受氣。𪜶去給𪜶及恁，以及恁的祖先毋識的神明燒香，服事𪜶。

4我一遍閣一遍差派我的僕人真多先知去給𪜶講：恁千萬毋通做我厭惡怨恨的事。

5毋拘𪜶毋聽，無欲聽趁，無欲放拺𪜶邪惡的行為，猶原給別個神明燒香。

6所以，我將親像火啲𤏸的大受氣摒落佇猶大的城鎮及耶路撒冷的街路；今仔日𪜶才會赫呢荒廢青凊。』

7「上主 — 萬軍的統帥、以色列的上帝閣講：『恁是按怎欲做即呢邪惡的事，害恁家己，互恁的查甫人、查某人、囝仔、食奶的嬰仔攏對猶大受剿滅，連一個都無留啲？

8恁是按怎逃難來埃及，閣造偶像，給別個神明燒香，激我受氣，致到恁受消滅，佇世界逐國成做人咒詛、侮辱的對象？

9恁豈已經𣍐記得恁的祖先、猶大列王及𪜶的后妃，以及恁家己及恁的某，佇猶大地、耶路撒冷的街路所做邪惡的事？

10到今仔日，恁猶無懺悔，猶毋驚，無欲遵行我給恁以及恁的祖先定的律法及規例。』

11「所以，上主 — 萬軍的統帥、以色列的上帝按呢講：『我決定欲降災禍互恁，給全部猶大人攏消滅。

12諸個決心來埃及寄居賰落來的猶大人，我欲給𪜶消滅，互𪜶攏死佇埃及，毋是互人刣死就是枵死；無論尊貴抑是卑微，攏欲因為戰亂、飢荒死去，成做人驚惶、咒詛、恥笑的對象。

13我按怎用戰亂、飢荒、瘟疫刑罰耶路撒冷，嘛欲按呢刑罰住佇埃及的猶大人，

14互諸個來埃及寄居猶活啲的猶大人，𣍐當逃脫倒去猶大地；雖然𪜶真愛欲轉去，毋拘除去少數的人以外，無人會當逃脫轉去。』」

15歸大陣住佇埃及地巴特羅的猶大人，就是許個知影家己的某有給別個神明燒香的查甫人，及在場的婦仁人，給耶利米講：

16「阮無欲聽你奉上主的名對阮講的話。

17阮一定欲照阮下的願去做，給天后燒香，獻奠酒祭，及阮，以及阮的祖先、君王、官員佇猶大逐個城鎮及耶路撒冷的街路所做的仝款，因為彼陣阮的糧食充足，平安無事。

18毋拘阮一下無給天后燒香、獻奠酒祭，就逐項攏無，甚至死佇戰亂及飢荒。」

19許個婦仁人嘛講：「阮確實有給天后燒香、獻奠酒祭。阮照天后的形像做餅獻互伊，給伊獻奠酒祭，阮的丈夫嘛攏知。」

20 耶利米給許個回答伊的查甫人及查某人講：

21「恁及恁的祖先、恁的君王及官員，以及國內的人民佇猶大的城鎮及耶路撒冷的街路燒香，上主豈會𣍐記得，攏無記佇心內？

22恁邪惡的行為及所做可惡的事，上主已經無欲閣吞忍，所以伊互恁的土地荒廢，無人住，成做人驚惶、咒詛的對象，到今仔日猶是按呢。

23恁給別個神明燒香，得罪上主，無欲聽上主的話，無遵行伊的律法、規例，及教示，所以到今仔日猶抵著諸個災禍。」

24 耶利米閣給全部的人，特別是查某人講：「所有來佇埃及的猶大人，著注意聽上主的話。

25上主 — 萬軍的統帥、以色列的上帝按呢講：恁及恁的某講『阮一定欲給天后謝願，給伊燒香，獻奠酒祭』，就按呢去做。今，做恁照恁下的願去謝願。

26恁所有住佇埃及的猶大人，著聽上主的話。我上主指我偉大的名立誓：佇埃及全地，𣍐閣有任何一個猶大人稱呼我的名號講『我指永活至高的上主咒誓』。

27恁著知，我會留心看𪜶，毋是欲賜福氣，是欲降災禍互𪜶，佇埃及的猶大人一定會死佇戰亂及飢荒，到全部消滅。

28雖然有人會當脫離戰亂，對埃及倒去猶大，毋拘是極少數。許個來埃及寄居賰落來的猶大人，後來會知是啥人的話會實現，是我的，抑是𪜶的。

29我欲佇遮給恁刑罰。這是我互恁的兆頭，互恁知我所講欲給恁降災禍的話一定會實現。上主按呢宣告。

30上主閣按呢講：我欲將埃及王法老合弗拉交互想欲刣伊的對敵，親像我有將猶大王西底家交互欲刣伊的對敵，巴比倫王尼布甲尼撒的手仝款。」