詩篇 29 - 現代台語譯本漢字版(TTVH)-闽南语

大闢的詩。上主掌管大自然

1天界大能者的眾子兒啊，

著將上主應有的榮光權能歸互伊。

著歸互伊！

2著將上主的名應有的榮光歸互伊，

存聖潔的心敬拜上主。

3上主的聲佇水面啲響；

榮光的上帝起雷大彈。

上主臨在佇海洋頂面。

4上主的聲有大氣力；

上主的聲威嚴滿滿。

5上主的聲拍折柏香樹；

上主拍碎黎巴嫩的柏香樹。

6伊互黎巴嫩趒跳親像牛仔子，

互黑門山趒跳親像野牛仔子。

7上主的聲互熠爁閃耀。

8上主的聲互曠野搖動；

上主互加低斯的曠野大振動。

9上主的聲互鹿母著驚生產，

互樹林的樹葉落甲光光光。

所有佇伊殿內的人攏喝講：「榮光歸上主！」

10上主設寶座佇大水頂面；

上主作王到永遠。

11上主賜氣力互伊的子民；

上主賜平安互伊的子民。