約翰一書 5 - 現代台語譯本漢字版(TTVH)-闽南语

較贏世間

1信耶穌是基督的人攏是上帝的子兒。疼父母，嘛會疼𪜶所生的子兒。

2咱若疼上帝閣遵守伊的誡命，按呢就知咱有啲疼上帝的子兒。

3遵守上帝的誡命就是疼上帝。伊的誡命毋是遵守。

4因為上帝的子兒攏會當較贏世間；互咱較贏世間的就是咱的信。

5較贏世間的是什麼人？豈毋是信耶穌是上帝的子的人？

見證耶穌基督

6此位耶穌基督就是通過水及血來的；毋是只有通過水，是通過水及血。聖神做見證，因為聖神是真理。

7有三個做見證，

8就是聖神、水，及血；此三個見證攏一致。

9人的見證咱都接受，上帝的見證閣較有效。此個是上帝為著伊的子所做的見證。

10信上帝的子的人，佇伊心內有此個見證；毋信上帝的人就是看上帝做白賊，因為伊毋信上帝為著伊的子所做的見證。

11此個見證就是：上帝已經有賜咱永遠的活命，此個活命是對伊的子來的。

12人有上帝的子就有活命；無上帝的子就無活命。

永遠的活命

13我寫諸個是欲互恁信上帝的子的人知，恁有永遠的活命。

14咱佇上帝面前勇敢無驚，因為咱若照伊的旨意祈求，伊會給咱聽。

15既然知伊會聽咱的祈求，就知咱對伊所求的已經有得著。

16若有人看著兄弟抑是姊妹犯著𣍐致到死的罪，著祈求上帝，上帝會賜伊活命；我是指許個犯著𣍐致到死的罪的人啲講。嘛有會致到死的罪，我講「著祈求」，並毋是指此個。

17一切不義的行為攏是罪，毋拘嘛有𣍐致到死的罪。

18咱知，上帝的子兒𣍐繼續犯罪，因為上帝的子啲給𪜶保守，邪惡者磕𪜶𣍐著。

19咱知，咱是屬上帝，毋拘全世界受邪惡者管轄。

20咱嘛知上帝的子已經來臨，閣互咱有曉悟的心通認識彼位真神上帝。咱及真神上帝結連，因為咱及伊的子耶穌基督結連。此位就是真神上帝，是永遠的活命。

21細子，恁著閃開偶像。