詩篇 42 - 現代台語譯本漢字版(TTVH)-闽南语

第二卷 (42-72 篇)可拉後代教示的詩，交互聖樂長。流亡者的祈禱

1上帝啊，我的心迫切欣慕你，

親像鹿迫切欣慕溪水。

2我的心嘴焦欣慕上帝，永活的上帝；

我什麼時會當到上帝面前去朝見？

3我暝日用目屎準飯吞；

我的對敵一直問我：「你的上帝佇叨位？」

4我早前導眾人做陣去上帝的厝，

用歡喜稱讚的聲大家守節。

我追念諸個代誌，

心非常悲傷。

5我的心啊，你是按怎鬱卒，

是按怎佇我內面哼哼呻？

著仰望上帝；

我猶久欲稱讚伊，

因為伊是我的拯救者，我的上帝。

6我的心佇我內面鬱卒，

所以我欲對約旦的地、黑門、米薩的山數念你。

7你的瀑布出聲，深淵及深淵相呼應；

你的波浪，你的大湧淹密我。

8日時，上主施落伊的慈愛；

暝時，伊互我唱歌，

對賜我活命的上帝祈求。

9我欲對上帝 — 我的石磐講：

「你是按怎𣍐記得我？

我是按怎著因為對敵的壓迫悲傷行來行去？」

10我的對敵欺負我，拍碎我的骨頭；

𪜶一直問我：「你的上帝佇叨位？」

11我的心啊，你是按怎鬱卒，

是按怎佇我內面哼哼呻？

著仰望上帝；

我猶久欲稱讚伊，

因為伊是我的拯救者，我的上帝。