羅馬書 2 - 現代台語譯本漢字版(TTVH)-闽南语

上帝的審判

1所以，你此個批判人的，無論你是什麼人攏𣍐當推責任；你批判別人是啲批判家己，因為你批判別人做的代誌，家己嘛逐項攏去做。

2咱知，做此款代誌的人，上帝會照事實給𪜶審判。

3你此個人，你批判別人做諸個代誌，家己嘛去做仝款的代誌，你想講你會當閃避上帝的審判是無？

4抑是講你看輕上帝極大的仁慈、寬容，及吞忍。你豈毋知伊的仁慈是欲導你悔改？

5你硬心，毋悔改，是啲為著家己累積上帝的受氣；此個受氣會佇伊公義審判彼日顯明。

6上帝會照逐人的行為給𪜶報應。

7許個堅持做好事，追求榮光、尊貴，及𣍐敗壞的性命的人，上帝會賜𪜶永遠的活命。

8許個自私，無遵趁真理，去趁不義的人，上帝的受氣及刑罰會臨到𪜶。

9所有做歹的人會受著患難困苦，代先是猶太人，後來才外邦人。

10不過所有做好的人會得著榮光、尊貴，及平安，代先是猶太人，後來才外邦人；

11因為上帝無偏待人。

12外邦人無摩西的律法，若犯罪嘛會受律法外的審判來滅亡；猶太人有摩西的律法，若犯罪會照律法受審判。

13因為，毋是聽律法的人佇上帝的面前是義人，只有實行律法的人才會互上帝宣判做義人。

14無律法的外邦人若照本性遵守律法的規定，𪜶雖然無律法，家己就是律法；

15按呢表示律法的要求有刻佇𪜶心內。𪜶的良心嘛證實，𪜶的心思有時家己責備，有時家己辯護。

16按呢，佇彼日，照我所傳的福音，上帝會通過基督耶穌來審判人隱密的事。

猶太人及律法

17按呢你咧，你自稱猶太人，倚靠律法，閣用上帝做誇口。

18你明白上帝的旨意，有受過律法的教導，會曉分別是非。

19你自信家己是啲給失明的人導路，是烏暗中的人的光，

20戇人的導師，幼稚的人的老師。你想講既然有律法，對智識及真理就有把握。

21你教示別人，是按怎無教示家己？你教人毋通偷提，家己有偷提無？

22你講毋通犯姦淫，家己有犯著無？你厭惡偶像，家己有搶廟寺無？

23你誇口有律法，家己有犯法來侮辱上帝無？

24聖經有記載：「因為恁的緣故，上帝的名佇外邦人的中間受褻瀆。」

25你若遵守律法，割禮就有價值；你若犯法，有割禮變做無割禮。

26無受割禮的人若遵守律法的規定，上帝豈無給伊算做有割禮？

27肉體無受割禮毋拘有遵守律法的人會給你定罪，因為你有律法的條文閣受割禮，毋拘顛倒違背律法。

28其實，外表作猶太人的毋是真正的猶太人；佇肉體所受外表的割禮嘛毋是真正的割禮。

29真正的猶太人是內在的；真正的割禮是心的割禮，是聖神的作為，毋是靠律法的條文。此款人受稱讚毋是對人，是對上帝來。