詩篇 80 - 現代台語譯本漢字版(TTVH)-闽南语

亞薩的詩，交互聖樂長；調，用「見證的百合花」。為復國祈禱

1 以色列的牧者，導約瑟親像啲導羊群的上帝啊，

求你俯耳孔聽；

坐佇天使基路伯寶座頂的主啊，

求你發出光。

2求你佇以法蓮、便雅憫、瑪拿西的面前，

顯出你的權能來救阮。

3上帝啊，求你互阮復興，

互你的面發光照阮，阮就得著解救。

4上主 — 萬軍的統帥上帝啊，

你對你子民的祈禱發受氣欲到偌久？

5你互阮用目屎做飯食，

用歸碗目屎做水飲。

6你互隔壁國因為阮相爭，

對敵做陣給阮恥笑。

7萬軍的統帥上帝啊，求你互阮復興，

互你的面發光照阮，阮就得著解救。

8你對埃及徙一欉葡萄樹，

趕出列邦，給伊栽種佇遮。

9你為著伊整地；

伊的根釘深，生湠滿地。

10伊的影遮密眾山；

伊的枝遮蓋大欉的柏香樹。

11伊的枝伸到地中海；

伊的籐湠到幼發拉底河。

12今你是按怎拆毀伊的籬笆，

出在所有過路的人挽葡萄，

13出在樹林內的山豬蹧躂，

出在田野的走獸吞食？

14萬軍的統帥上帝啊，求你越倒轉，

對天俯落看，照顧此欉葡萄樹，

15保護你正手所栽種的樹，

及你為家己所照顧的幼枝。

16許個用火燒，用刀剉葡萄樹的人，

求你發受氣給𪜶消滅。

17願你的手保護你正旁的人，

就是你為家己所揀選的人。

18按呢，阮就𣍐背叛你；

求你給阮救活，阮就欲求叫你的名。

19上主 — 萬軍的統帥上帝啊，求你互阮復興；

互你的面發光照阮，阮就得著解救。