羅馬書 5 - 現代台語譯本漢字版(TTVH)-闽南语

及上帝有和睦的關係

1既然，咱對信受稱做義人，就通過咱的主耶穌基督及上帝有和睦的關係。

2咱對信，通過基督通進入現在啲享受此個恩典，歡歡喜喜向望通分享上帝的榮光。

3毋若按呢，佇患難中，咱猶原歡歡喜喜，因為咱知，患難生出忍耐，

4忍耐生出老練，老練生出向望，

5向望𣍐致到見笑，因為上帝通過賜互咱的聖神將伊的疼灌入咱的心。

6咱猶軟弱的時，基督佇上帝所指定的日子為著有罪的人死。

7替義人死，差不多無；替好人死，豈採猶有人敢。

8不過上帝對咱證明伊疼咱，咱猶是罪人的時，基督有替咱死。

9現在基督已經為著咱流血犧牲，互咱及上帝有合宜的關係，伊閣較會救咱脫離上帝的受氣。

10因為，咱猶久作上帝對敵的時，伊互家己的子替咱死，互咱及伊閣和好。既然閣和好，咱閣較會因為基督的活來得著拯救。

11毋若按呢，咱現在已經通過基督及上帝閣和好，嘛會通過咱的主耶穌基督用上帝做誇口。

亞當及基督

12罪對一個人進入世間，死嘛隨入來；結果，所有的人攏會死，因為所有的人攏有犯罪。

13猶未有律法以前，罪已經佇世間；不過無律法，罪就無算做罪。

14毋拘對亞當到摩西彼段期間，死啲支配全人類，連無犯著亞當所犯的過失的人嘛著死。

亞當是啲欲來彼位的預表。

15不過亞當的過失及上帝白白的恩賜𣍐比得。因為，若對一個人的罪過眾人攏著死，上帝的恩典，就是伊通過耶穌基督一個人白白賜互眾人的恩賜，一定閣較豐富！

16一個人所犯的罪及上帝白白的恩賜𣍐比得。照審判，連一遍的過失嘛宣判「有罪」；毋拘照白白的恩賜，多多遍的過失嘛宣判「無罪」。

17若因為一個人的過失，死通過此一個人支配人類，按呢，耶穌基督一個人所成就的一定閣較大；所有領受上帝豐富的恩典，就是白白互上帝宣判無罪的人，會當通過基督來支配家己的性命。

18因為一個人犯罪，眾人攏受定罪；仝款，因為一個人義的行為，眾人攏受判無罪來得著活。

19因為一個人背逆，眾人攏成做罪人；仝款，一個人順服，眾人攏成做義人。

20律法的制定互罪過加添；毋拘罪加添，上帝的恩典閣較加添。

21按呢，罪通過死來支配，上帝的恩典是通過義來支配，互咱對咱的主耶穌基督得著永遠的活命。