啟示錄 3 - 現代台語譯本漢字版(TTVH)-闽南语

互撒狄的教會的批

1「你著寫批互撒狄的教會的天使，講：

「『有上帝的七個神及七粒星彼位按呢講：我知你的行為，人講你啲活，其實你是死。

2著醒起來，加強啲欲無去的氣絲仔，因為我看，佇我的上帝面前，你的行為猶無完全。

3所以，著會記得你所領受，所聽著的；著遵守，著悔改。你若無醒起來，我會親像賊來；你一定毋知我什麼時會來到你遐。

4毋拘，佇撒狄猶有一寡人𪜶的衫無拍垃墋，𪜶會穿白衫及我做夥行，因為𪜶會堪得。

5「『得勝的人像款會穿白衫；我一定𣍐對活命冊給伊除名。我會佇我的父及許個天使面前公開認伊的名。

6「『有耳孔的人攏著聽聖神給諸個教會講的話。』」

互非拉鐵非的教會的批

7「你著寫批互非拉鐵非的教會的天使，講：

「『聖潔閣真實，掌握大闢的鎖匙，開就無人會當關，關就無人會當開彼位按呢講：

8我知你的行為，你看，我已經佇你的面前給你開一個門，是無人會當關的；我知你干焦有淡薄氣力，卻有守我的道理，毋曾否認我的名。

9你看，撒旦的集團，𪜶自稱猶太人，其實毋是，是許個講白賊的；你看，我欲互𪜶來仆佇你的腳前，𪜶就知我有疼你。

10因為你有遵守我的道理吞忍到路尾，我嘛欲保守你脫離彼個試煉的時，此個時啲欲臨到全世界，來考驗住佇地上的人。

11我連鞭到；你所有的著堅守，才免有人給你的花冠提去。

12「『得勝的人，我欲互伊成做我的上帝殿內的柱；伊永遠𣍐閣離開。我欲將我的上帝的名，以及我的上帝的城，就是對天頂我的上帝遐降落新的耶路撒冷的名，及我新的名，攏寫佇伊頂面。

13「『有耳孔的人攏著聽聖神給諸個教會講的話。』」

互老底嘉的教會的批

14「你著寫批互老底嘉的教會的天使，講：

「『彼位阿們，忠信閣信實的見證人，上帝創造的根源，按呢講：

15我知你的行為，你無冷無燒。我較愛你看是燒抑是冷。

16既然你拉圇燒，毋成燒毋成冷，我啲欲對我的嘴給你呸出去。

17因為你講：我好額，已經大發財，攏無欠缺。你卻毋知你悲慘、可憐、散赤、失明，閣赤身露體。

18我勸你對我買經過火鍛鍊的金，通互你好額；閣買白的衫去穿，才免互人看著你褪裼的見笑；嘛買藥膏抹你的目睭，互你會看見。

19我所疼的人，我攏給𪜶責備及管教。所以，著熱心，著反悔。

20你看，我已經徛佇門外啲拍門；聽見我的聲來開門的人，我欲入去尋伊，及伊做夥食，伊嘛及我做夥食。

21「『得勝的人，我欲互伊及我做夥坐佇我的寶座，親像我已經得勝及我的父做夥坐佇伊的寶座。

22「『有耳孔的人攏著聽聖神給諸個教會講的話。』」