馬太福音 3 - 現代台語譯本漢字版(TTVH)-闽南语

施洗者約翰的洗禮及傳道(可 1.1-8；路 3.1-18；約 1.19-28)

1當時，施洗者約翰來猶太的曠野啲傳道。

2伊宣揚講：「恁著悔改，因為天國啲欲實現啦！」

3此個人就是先知以賽亞所啲講的：

有聲佇曠野啲喝：

著為主準備道路，

為伊修直小路。

4 約翰穿駱駝毛的衫，腰縖皮帶，所食的是草蜢及野蜜。

5有真多人對耶路撒冷、猶太逐所在，及約旦河一帶來伊遐，

6認罪，佇約旦河對伊領受洗禮。

7 約翰看著真多法利賽派及撒都該派的人嘛來領受洗禮，就對𪜶講：「恁諸個毒蛇，什麼人警告恁閃避上帝啲欲發的受氣？

8著用行為證明恁有悔改。

9恁毋通家己想講『亞伯拉罕是阮的祖先』，我給恁講，上帝會當用諸個石頭造子孫互亞伯拉罕。

10斧頭已經靠佇樹頭；所有無結好果子的樹攏欲給剉起來，㧒落火。

11我用水給恁洗禮，表示恁已經有悔改；毋拘佇我後面啲來彼位比我較有權能，我連給伊捾鞋都𣍐堪得；伊欲用聖神及火給恁洗禮。

12伊的手提簸箕，欲將麥埕的麥簸清氣，麥仔收入倉庫，麥芒就用𣍐化的火給伊燒掉。」

耶穌領受洗禮(可 1.9-11；路 3.21-22)

13彼時，耶穌對加利利來約旦河 約翰遐，欲對伊領受洗禮。

14約翰欲給伊阻止，講：「我應該對你領受洗禮，你反轉來尋我？」

15耶穌應講：「咱現在按呢做才合上帝一切的要求。」約翰就同意。

16耶穌領受洗禮以後隨時對水裡起來；忽然天為著伊開，伊看見上帝的神親像粉鳥降落來，歇佇伊身上。

17閣對天有聲講：

此個是我所疼的子，

伊，我真意愛。