詩篇 98 - 現代台語譯本漢字版(TTVH)-闽南语

一篇詩。頌讚掌管世界的上帝

1恁著向上主唱新的歌，

因為伊有做奇妙的事；

伊的正手，

聖的手骨施行拯救。

2上主已經宣布伊的救恩，

對列邦顯明伊的公義。

3伊會記得伊對以色列家應允的慈愛及信實；

天邊海角攏有看見咱的上帝的拯救。

4全地攏著向上主出歡喜的聲；

著出大聲歡喜唱歌稱讚伊。

5著彈琴稱讚上主，

彈琴唱好聽的詩歌謳咾伊。

6著用喇叭及哨角，

佇上主 — 咱的王面前出歡喜的聲。

7願海及海中的一切攏出聲；

世界及萬物嘛出大聲。

8願江河拍噗仔歡喜，

眾山嶺佇上主面前做夥快樂唱歌；

9因為伊來欲審判全地，

伊欲照公義審判世界，

用公平審判萬民。