傳道書 12 - 現代台語譯本漢字版(TTVH)-闽南语

1著佇少年的時記念創造你的主。佇年老痛苦的日猶未到，就是你所講「我無快樂」的年猶未來以前；

2佇日及光，月及星猶未變暗，雨落了烏雲猶未閣來以前；

3彼時，顧厝的人皮皮惙，有力的查甫人曲痀，挨磨的查某人減少煞停工，對窗仔啲看的婦仁人目睭煙暈，

4迵街路的大門關啲，挨磨的聲愈細聲，鳥仔啲哮的聲強欲聽無，查某囝仔唱歌的聲啲欲恬去；

5人驚𬦰高，驚路裡危險毋敢出門；杏樹開花，草蜢肥甲𣍐跳，慾情衰退；人轉去永遠的厝，歸陣送葬的人佇街路那行那哮；

6佇銀鍊仔猶未斷，金碗猶未破，水泉邊的水瓶猶未損壞，汲鼓井水的車輪猶未歹去，

7土粉歸回大地，靈魂倒轉去賜活命的上帝遐以前，著記念創造你的主。

8傳道者講：「空虛的空虛，一切攏是空虛。」

9傳道者毋若有智慧，閣繼續對民眾傳授智識；伊閣靜靜聽，查考，照次序編排真多箴言。

10傳道者專心尋激勵人的話，正確記錄真理的話。

11智慧的人的話親像刺棍；編輯者的話親像釘牢牢的釘仔，攏是對仝一個牧者來的。

12我的子啊，猶有一項，你著受勸戒；著冊多，無窮盡；冊讀多，身軀會厭倦。

13諸個事你攏已經聽了，結尾來講，著敬畏上帝，謹慎守伊的誡命；這是作人應盡的本分。

14人所做的代誌及一切祕密的事，無論好抑是歹，上帝攏欲審判。