雅歌 2 - 現代台語譯本漢字版(TTVH)-闽南语

1我是沙崙的玫瑰花，

是山谷的百合花。

(男)

2我的愛人佇查某囝仔中，

親像莿內的百合花。

(女)

3我親愛的佇查甫囝仔中，

親像樹林內的蘋果樹；

我真愛坐佇伊的蔭影下，

伊的果子我食起來真甜。

4伊導我入宴席廳，

用愛情的旗蓋佇我的頂面，

5用葡萄乾丸補我的力，

用蘋果贊我的元氣；

我愛伊愛甲破病。

6伊用倒手扶我的頭殼，

用正手攬我。

7 耶路撒冷的查某囝仔啊，

我指羚羊及田野的鹿母，懇切給恁吩咐，

毋通拍醒，毋通攪擾阮的愛情，

到阮歡喜滿足。

第二首(女)

8看咧，我親愛的來啦；

伊𨃟山過嶺趒趒跳跳啲來。

9我親愛的親像羚羊，親像鹿仔；

你看，伊徛佇牆仔外，

對窗仔啲看，

對窗仔軹啲探。

10我親愛的出聲對我講：

(男)

我的愛人，我的美人，起來，咱來去。

11冬天已經過，

雨已經煞。

12花開滿遍地，

鳥仔唱歌的時到啦，

佇田野有聽見斑鴿的聲。

13無花果漸漸成熟，

葡萄樹開花發出芳味；

我的愛人，我的美人，起來，咱來去。

14我的粉鳥啊，你匿佇石縫內，佇山巖隱密的所在；

求你互我看你的面，聽你的聲；

因為你的聲溫和，你的面真媠。

15給阮掠狐狸，

許個損壞葡萄園的細隻狐狸；

因為阮的葡萄抵仔啲開花。

(女)

16我親愛的是我的，我嘛是伊的；

伊佇百合花中啲飼羊。

17我親愛的啊，你著佇日涼冷，影伸長的時轉來，

親像羚羊，親像鹿仔，

對嵁硈的山嶺倒轉來。