詩篇 19 - 現代台語譯本漢字版(TTVH)-闽南语

大闢的詩，交互聖樂長。上帝的創造及律法

1天宣布上帝的榮耀；

穹蒼傳揚伊的作為。

2此日對彼日講話；

此暝對彼暝傳播智識；

3無言無語，

無聲無說。

4𪜶的聲音傳到全世界；

𪜶的言辭傳到天邊海角。

上帝為著日頭佇天頂搭布棚。

5日頭親像新郎對洞房出來，

親像選手踴躍走伊的路程，

6對天的此旁出來，踅到彼旁，

熱氣普及萬物。

7上主的律法完全，

互人得著新的氣力。

上主的命令可靠，

互無智識的人得著智慧。

8上主的律例公正，

互人的心歡喜。

上主的誡命純潔，

互人的目睭光明。

9敬畏上主是純真，永遠無改變；

上主的判斷真實，完全公道，

10比金，比真多純金較貴重；

比蜜，比純的蜂蜜閣較甜。

11律法互你的僕人得著警戒；

守誡命就有大報賞。

12啥人會知家己的錯誤？

求你赦免我無意中犯的過失！

13求你保守你的僕人，互伊𣍐故意犯罪；

求你毋通容允罪惡管轄我，

我就成做無通指責的人，

𣍐犯重罪。

14上主 — 我的避難所，我的救贖主啊，

願我的嘴所講的合你的旨意；

願我的心所想的得著你接納。