詩篇 110 - 現代台語譯本漢字版(TTVH)-闽南语

大闢的詩。上主及伊揀選的王

1上主對我的主講：

「你坐我的正旁，

聽候我互你的對敵做你的腳砧。」

2上主欲互你對錫安伸出權能的柺；

你著佇對敵的中間掌權。

3你出征的日，人民會甘心作兵；

你的壯丁會親像早起時的露水結合，來聖山跟隨你。

4上主有立誓，一定𣍐後悔，講：

「照麥基洗德的班次，你永遠作祭司。」

5主佇你的正旁，

伊受氣的日會拍敗列王。

6伊欲審判萬國，

拍敗𪜶的首領，

互身屍遍滿全地。

7王欲飲路邊的溪水，

重新得著氣力，百戰百勝。