詩篇 8 - 現代台語譯本漢字版(TTVH)-闽南语

大闢的詩，交互聖樂長；用迦特的樂器伴奏。上帝的威嚴，人的尊貴

1上主 — 阮的主啊，你的威嚴普及全地！

稱讚你的聲透到天頂，

2對囝仔及嬰仔的嘴唱出來。

你起造要塞防備敵人，

欲消滅對敵，消除冤仇。

3看著你親手創造的天，

你所安排的月娘、星辰，

4啊，人算什麼，你赫呢關心？

世間人算什麼，你赫呢照顧？

5你互伊比天使小可較低；

你賜榮光尊貴做花冠給伊戴。

6你指派伊管理你親手創造的萬物；

你互伊有權柄支配一切：

7一切的羊及牛，

山野的走獸，

8空中的飛鳥，

海洋的魚類及活物。

9上主 — 阮的主啊，你的威嚴普及全地！