撒母耳記上卷 7 - 現代台語譯本漢字版(TTVH)-闽南语

1 基列‧耶琳人就來，接上主的約櫃去山頂亞比拿達的厝；𪜶任命伊的子以利亞撒顧守上主的約櫃。

2約櫃留佇基列‧耶琳有二十年久；以色列全家痛悔歸向上主。

3 撒母耳對以色列全家講：「恁若欲專心歸順上主，著對恁中間除去外族的神明及亞斯她錄女神，堅決歸向上主，只有服事伊，伊會救恁脫離非利士人的手。」

4以色列人就除去逐所在的巴力及亞斯她錄女神，只有服事上主。

5 撒母耳講：「著聚集所有的以色列人來米斯巴，我欲為著恁向上主祈禱。」

6𪜶就聚集佇米斯巴，汲水倒佇上主的面前。彼日，𪜶禁食，佇遐懺悔講：「阮有得罪上主。」撒母耳就佇米斯巴裁決以色列民間的案件。

7 非利士人聽著以色列人佇米斯巴聚集，𪜶的首領就出兵攻擊以色列人；以色列人聽著就真驚。

8以色列人給撒母耳講：「請你繼續為著阮求叫上主 — 咱的上帝，求伊救咱脫離非利士人的手。」

9撒母耳就用一隻食奶的羊仔做燒化祭獻互上主；撒母耳替以色列人求叫上主；上主有聽伊的祈禱。

10撒母耳啲獻燒化祭的時，非利士人迫倚來欲攻擊以色列人。彼日上主大聲彈雷攻擊非利士人，拍亂𪜶；𪜶就刣輸，對以色列人的面前逃走。

11以色列人對米斯巴出來，追趕非利士人，追殺𪜶直到伯‧甲附近。

12 撒母耳佇米斯巴及善的中間𫞼一塊石，給伊號名叫做以便‧以謝，講：「到今仔日，上主一直有啲幫贊咱。」

13對彼日起，非利士人就屈服，毋敢閣侵入以色列人的領土。撒母耳活啲的時，上主的手阻止非利士人的侵犯。

14對以革倫到迦特，非利士人搶去的城攏還以色列人。以色列人收回攏總的領土。彼時，以色列人及迦南人和平相處。

15 撒母耳一生做以色列的士師。

16逐年伊巡視伯特利、吉甲、米斯巴諸個所在，裁決以色列民間的案件。

17伊巡視了後攏會倒去伊的故鄉拉瑪，佇遐做士師。伊嘛佇遐為著上主起一座祭壇。