1醒起來，著醒起來！
錫安啊，著堅強！
著穿媠的衣服！
聖城耶路撒冷啊，對今以後，
無受割禮，無清氣的𣍐閣入去你內面。
2 耶路撒冷啊，將土粉拌㧒确！
起來，坐佇王位！
恁諸個受掠的錫安的住民啊，
解開頷頸的鎖鍊！
3上主按呢講：恁互人賣去的時，無收著價錢；像款，恁得著自由，嘛毋免付贖金。
4至高的上主閣講：代起先，我的子民落去埃及寄居；後來，亞述人給𪜶欺壓。
5我的子民互人掠去做俘虜，無收著價錢；管轄𪜶的人給𪜶喝來喝去，歸日啲侮辱我的名。今，我欲採取行動。
6因為按呢，佇彼日，我的子民一定會識我的名，閣知啲講話的是我上主。恁看，我佇遮！
7𨃟山過嶺啲宣告和平，傳好消息的使者，
𪜶的腳跡偌仔呢媠！
𪜶宣告拯救，
對錫安講：你的上帝作王統治啦！
8聽！恁的守望者啲出大聲，
齊聲歡喜唱歌。
因為𪜶欲親目見證：
上主倒轉來錫安啦！
9荒廢的耶路撒冷啊，
著大聲歡喜唱歌；
因為上主有安慰伊的子民，
伊已經救贖耶路撒冷。
10上主已經佇萬國的眼前
顯出伊神聖的氣力；
普天下的人
攏會看見咱的上帝的拯救。
11著離開，著離開！
對巴比倫出來！
毋通沐著無清氣的物。
恁諸個扛上主器具的人，
著對巴比倫出來，著潔淨家己。
12毋拘恁毋免趕緊，毋免著急；
恁毋是啲逃命。
上主一定會佇恁頭前導路；
以色列的上帝一定佇恁後面保護。
受苦的僕人13上主講：
看咧，我的僕人欲做的一定會完成；
伊一定會受高舉得著榮耀，
受高升到至高。
14真多人看著伊，會奇怪卬愕；
因為伊的面貌受損傷，
伊的外表無親像人的款式。
15按呢，伊會互萬國著驚，
互列王掩嘴毋敢講話；
過去毋曾領受的人，會了解，
毋曾聽見的人，會領悟。
Who We AreWhat We EelieveWhat We Do
2025 by iamachristian.org,Inc All rights reserved.
