雅歌 7 - 現代台語譯本漢字版(TTVH)-闽南语

(男)

1尊貴的查某囝仔，你穿鞋的腳哪赫媠！

你大腿的曲線，媠親像珠寶，

是藝術家的傑作。

2你的肚臍親像杯圓圓，

有調和的酒不時滿墘。

你的腹肚親像歸堆的麥，

有百合花圍啲。

3你兩粒奶親像一對鹿仔，

親像鹿母的雙生子。

4你的頷頸親像象牙的塔，

目睭親像希實本的水池，

佇巴特‧拉併的城門邊。

你的鼻親像黎巴嫩的塔，面向大馬士革。

5你的頭攑高高親像迦密山，

垂落來的頭毛是紫色，

王的心互伊纏啲。

6我心愛的，你哪赫媠，赫可愛，

哪赫呢互人意愛！

7你的身材親像椰棗樹；

你的奶親像歸葩的果子。

8我講：我欲𬦰起去此欉椰棗樹挽果子。

願你的奶親像歸葩的葡萄，

你的氣親像蘋果赫呢芳，

9你的嘴親像上好的酒。

(女)

願彼個酒流入我親愛的的嘴，

飲了滑喉。

10我屬我親愛的，

伊所戀慕的是我。

11我親愛的啊，來，咱來去野外，

來去庄腳歇暝。

12咱透早起來，來去葡萄園，

看葡萄茁芛開花抑未，

石榴開花抑未；

佇遐我欲將愛情獻互你。

13催情果出芳味；

佇咱的門邊有逐款真好的果子，

新的舊的攏有；

我親愛的，這攏是我給你保存的。