但以理書 6 - 現代台語譯本漢字版(TTVH)-闽南语

但以理佇獅穴

1 大流士照伊的想法，設立一百二十個總督治理全國；

2佇𪜶的頂面閣設立三個總長，其中一個是但以理，監督許個總督，才免王過頭操勞。

3但以理因為有非常好的靈性，比其他的總長及總督較傑出，所以王欲指派伊治理全國。

4因為按呢，其他的總長及總督佇各種的事務欲尋但以理的孔縫，通給伊控告。毋拘𪜶尋無伊有什麼孔縫抑是過失，因為伊忠實可靠。

5許個人就參詳，講：「除了對但以理遵行伊的上帝的律法以外，咱𣍐當尋著給伊控告的理由。」

6諸個總長及總督相約來見王，對王講：「皇上萬歲！

7全國的總長、總督、省長、縣長，及顧問做夥參詳，欲請皇上降旨，宣布一個禁令：『三十日內，除了向王以外，若有人向任何神明抑是對人祈禱，著給伊㧒落獅穴。』

8皇上，請你制定簽署此條禁令，人就𣍐當改變此個命令，因為照米底亞及波斯的法律，簽署過的法令𣍐用得改變。」

9大流士就佇此個禁令簽署。

10但以理聽著王已經佇此個文件簽名，就倒去厝裡；伊樓頂的房間有窗仔開向耶路撒冷。伊照常一日三遍跪啲向上帝懇求感謝。

11許個人鬥陣去但以理遐，看著伊跪啲向上帝祈求幫贊，

12就閣來見王，對王提起禁令的代誌，講：「皇上，你豈毋是有簽署一個文件，規定三十日內，除去向皇上以外，若有人向任何神明祈禱抑是對人懇求，著給伊㧒落獅穴？」

王應講：「確實有。照米底亞及波斯的法律，此個法律𣍐用得變更。」

13𪜶就對王講：「皇上，彼個受掠的猶太人但以理無尊重王，無遵守你簽署的禁令。伊竟然一日三遍祈禱。」

14王聽了非常煩惱，想欲救但以理，歸日啲想辦法。

15後來，許個人閣相約來見王，對王講：「皇上，著會記得，照米底亞人及波斯人的法律，王頒布的禁令及法律𣍐用得改變。」

16王就下令掠但以理，給伊㧒落獅穴。王給但以理講：「你一直啲服事的上帝一定會救你。」

17有人搬一粒大粒石頭給獅穴的口塞啲；蓋王印及大臣的官印，給獅穴封起來，互但以理的案件𣍐當有什麼改變。

18王倒去王宮，歸暝禁食，無欲互人演奏樂器；彼暝，王睏𣍐去。

19隔日，王透早起來，趕緊去獅穴遐。

20伊倚近獅穴的邊仔，傷心叫但以理，講：「永活上帝的僕人但以理，你盡忠服事的上帝有救你無互獅咬無？」

21 但以理講：「皇上萬歲！

22我的上帝有派使者給許個獅的嘴封起來，無給我傷害，因為我佇上帝面前是無辜的。皇上，我嘛無做什麼傷害王的代誌。」

23王非常歡喜，就吩咐人將但以理對獅穴扭出來。但以理對獅穴出來，歸身軀攏無受傷，因為伊倚靠伊的上帝。

24王命令，將許個控告但以理的人及𪜶的某子攏掠起來，給𪜶㧒落獅穴。𪜶猶未到獅穴的底，獅就向𪜶罩去，咬碎𪜶的骨頭。

25後來，大流士通告全國無論叨一個民族、叨一個邦國、講叨一款語言的人民，講：「願恁平安富足！

26現在我降旨，我統治的全國人民，恁攏著敬畏但以理的上帝，

伊是永活的上帝，

永遠存在；

伊的國永遠𣍐消滅，

伊的王權永遠存續！

27伊解放，伊拯救，

佇天頂地上行神跡奇事；

伊解救但以理，

將伊對獅的嘴救出來。」

28 但以理佇大流士及波斯人塞魯士在位的時，事事亨通。