申命記 23 - 現代台語譯本漢字版(TTVH)-闽南语

禁止加入上主的會的條例

1性器官受傷抑是閹起來的人，𣍐用得加入上主的會。

2私生子𣍐用得加入上主的會；伊的子孫到第十代，嘛𣍐用得加入。

3 亞捫人及摩押人𣍐用得加入上主的會；甚至到第十代，嘛𣍐用得加入，

4因為恁出埃及的時，𪜶無佇路裡用食物及水迎接恁；閣倩美索不達米亞的比奪人，比珥的子巴蘭來給恁咒詛。

5毋拘上主 — 恁的上帝無聽巴蘭，因為上主疼恁，將彼個咒詛變做祝福。

6恁永遠毋通幫贊𪜶得著平安及繁榮。

7毋通怨恨以東人，因為𪜶是恁的親族；毋通怨恨埃及人，因為恁曾寄居佇遐；

8𪜶的子孫到第三代通加入上主的會。

保持軍營清氣的條例

9恁出去紮營欲攻擊對敵的時，著避免互恁致到禮儀上無清氣的事。

10恁中間若有人夢洩致到無清氣，伊著出去營外，毋通閣入來營內；

11到欲暗的時，伊著用水洗身軀，到日落才通閣入營。

12恁佇營外著規畫一個所在做便所。

13恁的裝備著有托仔，互恁佇外面大小便的時，用來挖土，蓋恁所放的；

14因為上主 — 恁的上帝佇恁的營內及恁同在，欲保護恁，將對敵交互恁，所以恁的兵營著保持聖潔；才免伊看見恁中間有污穢，就離開恁。

其他的條例

15若有奴隸逃脫，走去恁遐，恁毋通將伊交轉去互伊的主人；

16恁著互伊住佇伊所愛的所在，所揀的城，及恁做夥徛起；恁毋通給伊欺負。

17 以色列的男女毋通有人佇寺廟做妓女抑是孌童。

18寺廟的妓女及孌童賺的錢，毋通帶入來上主 — 恁的上帝的聖殿謝願；因為此兩項攏是上主 — 恁的上帝厭惡的。

19恁的同胞無論給恁借錢銀、食物，抑是會生利息的物件，攏毋通提利息；

20外族人若給恁借，恁通提利息，毋拘借互恁的同胞就毋通給伊提；按呢，上主 — 恁的上帝會佇恁欲入去佔領的地，佇恁所做一切的事，賜福恁。

21恁對上主 — 恁的上帝下願，謝願毋通延遲，因為上主一定會給恁討；恁若無謝願，就有罪。

22恁若無下願，顛倒無罪。

23恁所有親嘴對上主 — 恁的上帝甘心下的願，著切實遵守。

24恁入去厝邊的葡萄園，通照恁所愛挽來食，毋拘毋通貯佇器具內。

25恁入去厝邊猶未收割的麥園，通用手摘麥穗，毋拘毋通用鐮𠠝仔割。