羅馬書 6 - 現代台語譯本漢字版(TTVH)-闽南语

及罪斷絕關係，為上帝來活

1按呢，咱欲講什麼？咱是著繼續佇罪惡中生活，通互恩典閣較加添是無？

2絕對毋是！咱諸個向罪已經死的人豈通繼續佇罪惡中生活？

3恁豈毋知，咱攏受洗禮來及基督耶穌結合，是受洗禮來及伊死？

4既然咱通過洗禮及伊死，做夥埋葬，所以，親像基督通過天父榮光的權能對死閣活，咱嘛著過新的生活。

5既然咱及基督成做一體來經驗伊的死，咱一定嘛會及伊結合來閣活。

6咱知，咱舊的自我已經及基督做夥釘十字架，是欲互受罪拘束彼個舊的人毀滅，互咱無閣做罪的奴隸。

7因為人一旦死去就對罪得著解放。

8既然咱已經及基督做夥死，咱相信咱嘛會及伊做夥活。

9咱知基督已經對死人中閣活，𣍐閣死，死𣍐閣支配伊。

10因為伊有死，一遍就完全給罪制壓；伊現在啲活，是為著上帝啲活。

11按呢，恁嘛著看家己已經及罪斷絕關係，及基督耶穌結合，為著上帝啲活。

12所以，毋通將恁會死的身軀交互罪支配，去順趁本性的慾望。

13嘛毋通將恁身軀的肢體交互罪去做不義的工具。反轉著做一個對死人中閣活的人，將家己獻互上帝，將身軀的各肢體獻互伊做義的工具。

14毋通互罪給恁支配，因為恁毋是活佇律法下，是活佇恩典下。

義的奴僕

15若按呢，因為咱毋是佇律法下，是佇恩典下，咱就通犯罪是無？絕對毋通！

16豈毋知恁若將家己交互某人作奴隸順趁伊，恁就是彼個人的奴隸；按呢講，恁是作罪的奴隸致到死，抑是作上帝的奴僕順趁伊致到及伊有合宜的關係？

17感謝上帝，雖然恁曾作罪的奴隸，現在已經對心底順趁彼個傳授互恁做典範的教示。

18恁已經對罪得著解放，成做義的奴僕。

19驚了恁𣍐了解，我用一般人的話給恁講。親像恁以前曾將身軀完全交互污穢及不法，互不法加添，現在恁著將恁身軀的逐部份獻互義做聖潔的路用。

20恁作罪的奴隸彼時，恁無受義約束。

21彼時恁做現在看做見笑的代誌，結果是按怎？結局是死。

22現在恁已經對罪得著解放，成做上帝的奴僕，彼個結果是成做聖潔；結局是永遠的活命。

23因為罪的代價是死，毋拘上帝通過咱的主基督耶穌白白賜互咱的恩典是永遠的活命。