詩篇 74 - 現代台語譯本漢字版(TTVH)-闽南语

亞薩教示的詩。求上主解救國家

1上帝啊，是按怎你永遠放拺阮？

是按怎你對你草埔的羊發受氣，氣甲鼻孔淐煙？

2求你會記得你早前揀選的子民，

你所贖回做你產業的民族，

嘛會記得你所徛起的錫安山。

3求你行來久久拋荒的所在，

看對敵徹底毀壞的聖所。

4你的對敵佇你殿內歡呼，

𫞼𪜶的旗做記號，

5親像人攑斧頭，

剉樹林的樹。

6聖所內面一切的雕刻，

𪜶用斧頭及槌攏總破壞。

7𪜶放火燒毀你的聖所，

拍垃墋你徛起的所在。

8𪜶參詳講：「咱來給𪜶徹底毀壞。」

𪜶將逐位敬拜上帝的所在攏燒了了。

9阮無閣看見兆頭，

嘛無閣有先知；

此款情形會到什麼時，阮中間無人知。

10上帝啊，對敵譏刺會到什麼時？

敵人褻瀆你的名會到永遠嗎？

11你是按怎手勼起來毋插阮？

求你手伸出來給𪜶毀滅。

12總是上帝對古早就是我的王，

佇地上施行拯救。

13你曾用你的權能將海分開，

摃破水中海怪的頭殼。

14你曾摃碎海獸的頭殼，

互曠野的野獸做食物。

15你曾分開水源及河流，

曾互長流的江河焦去。

16日時及暝時，是你所安排；

日頭及光體是你所創造。

17地上一切的界限是你所定；

夏天及冬天是你所設。

18上主啊，求你記得對敵按怎啲誹謗，

愚戇的人按怎啲褻瀆你的名。

19求你毋通將馴良子民的性命交互野獸，

毋通永遠𣍐記得你散赤的族群。

20求你會記得及阮立的約，

因為地上烏暗的所在攏是強暴的人的巢穴。

21求你毋通互受壓制的人見笑轉去；

求你互困苦散赤的人稱讚你的名。

22上帝啊，求你起來為家己辯護，

會記得戇人歸日按怎啲誹謗你。

23求你毋通𣍐記得你對敵的喊喝，

毋通𣍐記得起來攻擊你的人無停的嗆聲。