1𨃟過節的六日前，耶穌去伯大尼，就是耶穌互彼個對死閣活的拉撒路住的所在。
2有人佇遐為著耶穌準備暗頓。馬大啲招待；拉撒路是及耶穌仝桌的一個。
3馬利亞提一罐純的高貴哪噠芳油來抹耶穌的腳，閣用家己的頭毛給伊拭；油的芳味互歸厝內芳貢貢。
4耶穌的一個門徒，就是後來出賣耶穌彼個以斯加略的猶大，講：
5「哪毋提此個芳油去賣三百個銀仔來賑濟散赤人？」
6伊按呢講毋是伊關心散赤人，是因為伊是賊，閣常常偷提伊啲管理的公款。
7耶穌講：「毋通給伊擋！此個芳油是伊為著我埋葬的日準備的。
8不時有散赤人及恁做夥，不過我𣍐不時及恁做夥。」
刣拉撒路的陰謀9有一大群猶太人聽著耶穌佇伯大尼就去遐；𪜶毋若為著欲看耶穌，嘛想欲看耶穌互伊對死閣活彼個拉撒路。
10所以，諸個祭司長計謀連拉撒路亦欲給伊刣，
11因為有真多猶太人為著拉撒路的緣故離開𪜶去信耶穌。
耶穌光榮進入耶路撒冷(太 21.1-11；可 11.1-11；路 19.28-40)12隔日，來過節的一大群人聽著耶穌欲來耶路撒冷，
13就攑棕樹枝出去迎接，喝講：
和散那！
奉主的名來彼位應該受稱讚！
以色列的王應該受稱讚！
14耶穌看著一隻驢仔子，就牽來騎。照聖經所記載：
15 錫安的婦仁人啊，毋免驚！
看，恁的王騎驢仔子啲來啦！
16伊的門徒原來𣍐了解此項代誌，毋拘耶穌得著榮光的時，𪜶才想著聖經所記載此項代誌是啲指耶穌；代誌嘛照按呢發生佇伊身上。
17耶穌叫拉撒路出墓互伊對死閣活彼時，及耶穌做夥佇遐彼群人有繼續啲做見證。
18眾人嘛出去迎接耶穌，因為𪜶有聽著伊行此個神跡。
19法利賽派的人就互相講：「咱較做嘛無採工。恁看，全世界攏隨伊去啦！」
希臘人求欲見耶穌20節期中去耶路撒冷朝拜的有幾若個希臘人。
21諸個人來見加利利的伯賽大人腓力，給伊講：「先生，阮愛見耶穌。」
22 腓力去給安得烈講，安得烈及腓力就做夥去給耶穌講。
23耶穌應講：「人子得著榮光的時到啦。
24我實實在在給恁講，一粒麥仔若無落地死，猶原是一粒若定；若死，就結真多麥仔。
25疼惜家己的性命的，會喪失性命；佇此世間甘願犧牲家己的性命的，會保守性命直到永遠活。
26人若欲服事我，著隨我；我佇叨位，服事我的人嘛會佇遐。人若服事我，我的父會給伊尊重。」
人子著受舉起27「此陣，我的心亂操操，我欲講什麼？豈欲講『父啊，救我脫出此個時刻』？毋是。我是為著此個時刻才來。
28父啊，願你榮耀你的名。」
然後有聲對天頂來，講：「我已經有榮耀我的名，欲閣再榮耀。」
29徛佇遐的群眾聽著此個聲，想講「雷啲彈」；嘛有人講「天使有對伊講話」。
30耶穌應講：「此個聲毋是為著我，是欲互恁聽的。
31現在是此個世間受審判的時；現在此世間的統治者啲欲受推翻。
32我對地上受舉起的時，會吸引萬民歸倚我。」
33耶穌按呢講是表明伊啲欲按怎死。
34群眾應伊講：「阮聽著律法有記載，基督永遠存在。你哪會講人子著受舉起？此個人子是什麼人？」
35耶穌對𪜶講：「光猶會佇恁中間一時仔久。恁著趁有光的時繼續行，才𣍐互烏暗遮蓋。佇烏暗中啲行的人毋知會行去叨位。
36趁有光的時，恁著信光，互恁通成做光明的人。」
猶太人毋信耶穌諸個話講煞，耶穌離開𪜶，匿起來。
37雖然耶穌佇𪜶面前有行赫多神跡，𪜶猶毋信伊。
38這是欲應驗先知以賽亞的話，講：
主啊，什麼人信阮所傳的信息？
主的權能有對什麼人顯示？
39𪜶𣍐當相信的原因，以賽亞有閣按呢講：
40上帝互𪜶的目睭𣍐看見，
互𪜶的心硬，
才免𪜶的目睭看見，
𪜶的心明白，來歸向我，
我就給𪜶醫好。
41 以賽亞按呢講，是因為伊有看見耶穌的榮耀，才講關係伊的代誌。
42雖然是按呢，猶久有真多猶太人的領袖信耶穌；不過因為𪜶驚法利賽人，毋敢公開承認，才免受革出會堂。
43𪜶愛人的稱讚贏過上帝的稱讚。
耶穌的話欲審判人44耶穌大聲喝：「信我的人毋是信我，是信差我來彼位。
45看見我就是看見差我來彼位。
46我作光來到此世間，是欲互信我的人攏𣍐𫢶佇烏暗。
47聽我的話無遵守的人，我𣍐給伊審判。因為我毋是來欲審判世間人，是欲拯救世間人。
48拒絕我，毋接受我的話的人，有一個審判者會給伊審判。佇末日，我所講的話會給伊審判。
49因為我毋是照家己的意思講，是照差我來的父互我的命令才講什麼，傳什麼。
50我知伊的命令會互人得著永遠的活命。所以，我講的攏是照父給我講的。」
Who We AreWhat We EelieveWhat We Do
2025 by iamachristian.org,Inc All rights reserved.
