1五旬節的日到，門徒攏聚集佇一所在。
2忽然有聲對天頂來，親像透大風，充滿𪜶啲坐的歸間厝。
3閣有親像分開的火舌對𪜶出現，歇佇逐個人的頂面。
4𪜶攏受聖神充滿，照聖神互𪜶的才能開始講別種語言。
5彼時，有一寡虔誠的猶太人對世界逐國來，住佇耶路撒冷。
6聽著此個聲響，眾人就攏聚集倚來。因為逐個人聽著門徒用𪜶的本地話對𪜶講話，煞愣去。
7𪜶著驚閣奇怪，講：「你看，諸個啲講話的豈毋是攏加利利人？
8咱哪會聽著𪜶攏用咱逐個人住的所在的語言啲講話？
9咱諸個帕提亞人、米底亞人、以攔人，以及對美索不達米亞、猶太及加帕多家、本都及亞細亞、
10弗呂家及旁非利亞、埃及及倚近古利奈的利比亞地區來的人，嘛有對羅馬來的出外人，內面有
11猶太人及改宗入猶太教的人，閣有克里特人及阿拉伯人，咱竟然聽著𪜶攏用咱在地的話講起上帝所做偉大的代誌。」
12大家著驚閣卬愕，問來問去：「這是什麼代誌？」
13有人恥笑講：「諸個人是飲新酒啲醉。」
彼得的講道14此個時，彼得及十一個使徒徛起來，大聲對眾人講：「猶太人及所有住佇耶路撒冷的人，恁著知，注意聽我的話。
15諸個人毋是照恁所想啲酒醉，此陣才早起時九點。
16其實這就是先知約珥所講的。
17上帝講：佇終末的日子，
我欲將我的神摒落去互所有的人。
恁的子，查某子會講預言；
恁的少年人會看見異象；
恁的老人會作夢。
18閣佇許個日，
我嘛欲將我的神摒落去互我的僕人及女婢；
𪜶會講預言。
19我欲佇天頂顯出奇事，
佇地上行神跡，
有血、火，及煙霧。
20佇主大閣榮耀的日來臨以前，
日頭會變做烏暗，
月變做親像血赫呢紅。
21彼時，所有求叫主的名的人攏會得著救。
22「以色列人，恁著聽諸個話。照恁所知，上帝通過拿撒勒人耶穌佇恁中間行權能、奇事，及神跡，來對恁證明伊是上帝所指派的。
23上帝照伊預定的旨意及計劃，將耶穌交互恁；恁用無律法的人的手將伊釘佇十字架頂，給伊殺害。
24上帝給伊解除死的痛苦，互伊閣活，因為死無法度給伊控制。
25大闢曾指伊講：
我看見主不時佇我的面前，
伊佇我的正旁，互我𣍐動搖；
26因為按呢，我的心歡喜，我的舌快樂；
我此個會朽爛的肉體會靠向望來活。
27因為你𣍐給我放拺佇陰府，
嘛𣍐互你的聖者朽爛。
28你已經指示我活命的道路，
互我佇你的面前充滿歡喜。
29「各位兄弟，關係先祖大闢的事，我好膽給恁講。伊已經死，閣埋葬啦，伊的墓今仔日猶佇咱遮。
30伊是先知，知上帝有對伊嚴肅應允，欲對伊的子孫任命一個作王來坐伊的寶座。
31大闢先看出此個代誌，關係基督的閣活有講：
伊無受放拺佇陰府；
伊的肉體嘛無朽爛。
32此位耶穌，上帝已經有互伊閣活。阮攏是此項事的見證人。
33伊已經受高升到上帝的正旁，閣對父領受所應允的聖神，伊現在將此位聖神摒落來互阮，就是恁現在所看見閣聽見的。
34大闢毋曾上天，毋拘伊講：
主對我的主講：
你坐我的正旁，
35聽候我互你的對敵屈服佇你腳下。
36「所以，以色列全家著確實知，恁給伊釘十字架此位耶穌，上帝已經任命伊做主，做基督啦！」
37眾人聽著諸個話，心親像互刺鑿著，對彼得及其他的使徒講：「各位兄弟，阮應該做什麼？」
38 彼得對𪜶講：「著悔改，逐個人攏著奉耶穌基督的名受洗禮，互恁的罪得著赦免，就會領受上帝所賜的聖神。
39因為此個應允是欲互恁及恁的子孫，以及一切佇遠的所在的人，就是咱的主上帝所呼召來歸伊的人。」
40 彼得閣用真多話出力做見證，勸勉𪜶，講：「著救家己脫離此個邪惡的世代。」
41對按呢，領受伊的信息的人攏受洗禮；彼日信徒大約加添三千人。
42𪜶全心領受使徒的教示，參與團契生活，擘餅，祈禱。
信徒的團契生活43使徒行真多奇事神跡，引起眾人敬畏的心。
44所有的信徒攏做夥生活，所有的物公家用，
45閣賣家產財物，照逐個人的需要分互大家。
46𪜶逐日同心合意佇聖殿聚會，閣佇一家一家擘餅，用歡喜誠心做夥飲食，
47頌讚上帝，閣得著眾人歡喜接納。主將得救的人日日加添互𪜶。
Who We AreWhat We EelieveWhat We Do
2025 by iamachristian.org,Inc All rights reserved.
