詩篇 10 - 現代台語譯本漢字版(TTVH)-闽南语

1上主啊，你哪會徛遠遠？

患難的時，你哪會匿啲毋插阮？

2歹人驕傲瘋狂，給困苦的人趇牢牢；

著互𪜶陷落家己所設的計謀。

3歹人誇口𪜶心內的慾望；

貪心的人褻瀆上主，藐視伊。

4歹人驕傲，心中無上帝，

講：「上主𣍐追究。」

5歹人的所做事事順利；

上帝的審判，𪜶無看在眼內。

所有的對敵，𪜶攏藐視。

6歹人心內講：「阮一定𣍐失敗，

世世代代𣍐抵著災難。」

7歹人滿嘴咒罵、奸詐、恐嚇；

𪜶的舌惡毒、虛假。

8𪜶佇庄內埋伏啲當等，

目睭直直啲相無依倚的人；

𪜶匿佇隱密的所在欲殺害無辜的人。

9𪜶埋伏佇隱密的所在，親像獅匿佇穴裡，

當等欲掠散赤人，

用網給𪜶網啲拖去。

10𪜶屈啲當等，

互無依倚的人陷落𪜶的爪牙。

11𪜶心內講：「上帝𣍐記得；

伊掩伊的面，永遠𣍐看見。」

12上主啊，求你徛起來，

上帝啊，攑起你的手；

毋通𣍐記得散赤人。

13歹人是按怎藐視上帝，

心內講伊𣍐追究？

14上主，你有看見，

惡毒、怨妒，你攏有啲監察；

你欲用你的手報應。

無依倚的人將本身交代你；

你一直有啲幫贊孤兒。

15願你拍斷歹人的手骨；

願你徹底追究𪜶的歹。

16上主作王，對永遠到永遠；

列邦攏對伊的地消滅。

17上主啊，散赤人的心願，你會聽；

你欲壯𪜶的膽，俯耳孔聽𪜶的祈求。

18你欲替孤兒及受壓迫的人申冤，

互世間人無閣恐嚇𪜶。