以賽亞書 18 - 現代台語譯本漢字版(TTVH)-闽南语

上帝審判古實

1佇古實的河彼旁有一塊地，

佇遐有聽著真多翼啲的聲；

2遐有真多使者

坐蘆葦造的船對尼羅河落來。

恁諸個行動敏捷的使者，著去，

去一個身材高大、皮膚光滑的民族遐，

一個遠及近的人攏驚畏的國家，

一個強大、愛踐踏人的國家；

𪜶的土地互河流分開。

3恁諸個住佇世間，

地上所有的住民啊！

大旗佇山頂𫞼起來的時，著看，

哨角歕的時，著聽！

4上主對我講：

「我欲對我徛起的所在

恬恬觀看，

親像日光的炎熱，

親像收割的時露水蒸發的雲霧。」

5葡萄猶未收成以前，

花謝，欲結做葡萄的時，

上主會用鐮刀將幼枝割斷，

將艷艷的葡萄藤剪㧒确。

6𪜶會受棄拺，㧒互山頂的鷹鳥，

擲互地上的野獸；

佇夏天，互鷹鳥作巢，

佇冬天，互野獸歇睏。

7彼時，有一個國家，土地互河流分開；伊的人民身材高大，皮膚光滑，踐踏人，互遠及近的人攏驚畏。𪜶會來到錫安山敬拜上主，獻禮物互上主 — 萬軍的統帥。