何西阿書 12 - 現代台語譯本漢字版(TTVH)-闽南语

1 以法蓮歸日啲趇東風，

所做無採工；

四界攏是白賊及強暴。

𪜶及亞述立約，送橄欖油互埃及。

2上主控告猶大，

嘛欲照以色列的行為責罰伊，

照𪜶的所做給𪜶報應。

3𪜶的祖先雅各佇胎裡扭牢兄哥的腳後蹬；

壯年的時及上帝相偃。

4伊偃贏天使，

流目屎求祝福。

伊佇伯特利抵著上帝，

佇遐及伊講話。

5上主是萬軍的統帥上帝；

伊的稱呼是上主。

6所以你著歸向你的上帝，

持守慈愛公正，

不時耐心聽候你的上帝。

7 以色列親像生理人，

愛用無公道的秤欺騙人。

8伊講：「我真正好額，有真多財寶；

無人會當指責我賺的是橫財。」

9對你出埃及的時，

我就是上主 — 你的上帝；

我欲互你閣住佇布棚，

親像啲守節期。

10我曾對先知講話，

互𪜶看見真多異象，

通過𪜶講譬喻。

11 基列有犯罪，

佇遐的住民攏無路用，

因為𪜶佇吉甲獻牛仔做祭；

𪜶的祭壇會變做親像園裡犁溝頂面的石堆。

12早前雅各走去亞蘭地，

以色列為著欲娶某給人做工，

為著欲得著某替人飼羊。

13上主用先知導以色列人出埃及，

嘛通過先知照顧𪜶。

14毋拘𪜶惹上帝受氣。

主會將𪜶流人的血的罪歸佇𪜶；

𪜶凌辱主，主一定會給𪜶刑罰。