約翰福音 3 - 現代台語譯本漢字版(TTVH)-闽南语

耶穌及尼哥德慕

1有一個法利賽派的人名叫做尼哥德慕，是猶太人的領導者。

2有一暗，此個人來見耶穌，講：「拉比，阮知你是上帝差來的教師。若毋是上帝同在，無人會當行你所行諸個神跡。」

3耶穌應講：「我實實在在給你講，人若無重出世，就𣍐當看見上帝國。」

4 尼哥德慕問講：「人已經老，哪會當重出世？豈講伊會當閣一遍入去母胎來出世？」

5耶穌應講：「我實實在在給你講，人若無對水及聖神來出世，就𣍐當成做上帝國的子民。

6對肉體生的，是肉體；對聖神生的，是神靈。

7毋通因為我講『恁著重出世』來奇怪。

8風欲吹去叨位就吹去叨位，你有聽著聲，毋拘毋知伊對叨位來，對叨位去。逐個對聖神生的嘛是按呢。」

9 尼哥德慕問耶穌講：「此款代誌哪有可能？」

10耶穌應講：「你是以色列人的教師，連這都毋知噢？

11「我實實在在給你講，阮講阮所知的，嘛為著阮所看著的作證，毋拘恁毋接受阮的見證。

12我給恁講此世間的代誌，恁都毋信，我若給恁講天頂的代誌，恁哪欲信？

13對天頂降臨的人子以外，無人曾上天。

14「親像摩西佇曠野舉起銅蛇，人子嘛一定著按呢受舉起，

15互逐個信伊的人得著永遠的活命。

16上帝連伊獨一的子都賜互世間，欲互逐個信伊的人免滅亡，反轉得著永遠的活命，伊即呢疼世間！

17因為上帝差伊的子來世間，毋是欲審判世間，是欲通過伊來拯救世間。

18「信子的人𣍐受定罪；毋信的人已經受定罪，因為伊毋信上帝獨一的子。

19上帝的審判是按呢：光進入世間，世間人較愛烏暗，較無愛光明，因為𪜶的行為邪惡。

20做歹的人攏怨恨光，毋接近光，按呢伊的行為才𣍐露現。

21毋拘實行真理的人接近光，是欲顯明伊的行為是順趁上帝來做的。」

約翰為著耶穌作證

22諸個代誌以後，耶穌及伊的門徒去猶太地區，伊及𪜶暫時住遐，閣給人洗禮。

23約翰嘛佇撒冷附近的哀嫩啲給人洗禮，因為遐有真多水，眾人續接來接受約翰的洗禮。

24彼時約翰猶未互人關監。

25幾若個約翰的門徒及一個猶太人為著潔淨的禮儀辯論。

26𪜶來見約翰，對伊講：「拉比，以前佇約旦河東岸及你做夥，你曾為著伊作證彼位，你看，伊現在啲給人洗禮，眾人攏去伊遐。」

27 約翰應講：「若毋是天賞賜，人𣍐當得著什麼。

28我曾講『我毋是基督，不過是受派做伊的先鋒』。此個代誌，恁本身是我的見證人。

29娶新娘的是新郎；新郎的朋友徛佇邊仔，一下聽著新郎的聲就非常歡喜。所以，我的歡喜滿滿。

30伊一定愈興旺，我一定愈衰微。」

對天降臨的上帝的子

31對頂面來的，佇萬有的頂面；對地上來的，屬地上，所講的是地上的事。對天頂來的，佇萬有的頂面。

32伊為著所看見的及所聽見的作證，不過無人接受伊的見證。

33接受伊見證的人證明上帝是信實。

34上帝所差遣彼位講上帝所講的話，因為上帝無限量賜聖神互伊。

35父疼子，已經將一切攏交佇伊的手中。

36信子的人會得著永遠的活命；毋順服子的人毋若𣍐得著活命，反轉繼續互上帝受氣。