1上主對我講：
2「人子啊，這就是我 — 至高的上主欲對以色列人民宣布的話：終局到啦，以色列國四境的終局近啦！
3「以色列啊！你的終局到啦。我欲對你發大受氣。我欲照你的行為審判你，欲因為你所做通厭惡的事刑罰你。
4我無欲憐憫你，無欲同情你。我欲照你的行為報應你，照你所做通厭惡的事刑罰你。按呢，你就知我是上主。」
5至高的上主閣講：「看咧，災難會一個接一個臨到。
6你的終局近啦！你的終局到啦！看咧，你𣍐走閃得啦！
7國內的住民，災難臨到啦。時到啦，日子逼近啦！山頂的祭壇欲有混亂，無閣有歡喜快樂的聲。
8「我真緊就欲將我的大受氣摒佇你身上，將我的受氣攏摒互你。我欲照你的行為審判你，欲因為你所做通厭惡的事刑罰你。
9我無欲憐憫你，無欲同情你。我欲照你的行為報應你，照你所做通厭惡的事刑罰你。按呢，你就知給你刑罰的是我上主。
10「看咧，彼日來啦，災難已經到啦；驕傲已經茁芽，柺仔已經開花。
11強暴興起，變做刑罰歹人的柺仔。𪜶所有的攏欲無去，財富、尊貴攏欲失去。
12「時到啦，彼日近啦，買的人毋免歡喜，賣的人毋免傷心，因為上主的大受氣欲降落佇𪜶眾人身上。
13無一個賣主會當活到給伊賣出去的買轉來，因為上主關係此個人民的異象一定𣍐廢止。無人會當佇家己的罪惡中保全性命。
14𪜶歕哨角，軍器準備好勢，毋拘無人上戰場交戰，因為我的大受氣欲降落佇眾人的身上。」
刑罰以色列的罪惡15上主講：「城外有戰爭，城內有瘟疫、飢荒。佇田野的人攏欲死佇刀下；城內的人攏欲病死，餓死。
16𪜶中間若有人逃脫，會佇山頂為家己的罪，親像山谷中的粉鳥哀怨吐氣。
17𪜶逐個人的手攏無力，驚甲腳痠手軟。
18𪜶欲穿麻衫，歸個人驚惶愕愕惙；逐個人攏剃光頭，見笑無面子。
19𪜶欲將金銀㧒佇街路，親像擲糞埽仝款。佇上主發大受氣的日，金銀無法度解救𪜶，因為金銀𣍐當滿足𪜶的慾望，𣍐當互腹肚食飽，顛倒互𪜶跋倒犯罪。
20𪜶曾誇口𪜶媠的珠寶，閣用許個珠寶鑄造通厭惡的偶像。所以，上主欲互𪜶看家己的珠寶做污穢的物件。
21「我欲互外族人給伊搶奪，叫匪徒給伊搶劫；𪜶欲給伊拍垃墋。
22我欲面越走毋插以色列，出在我聖的所在受褻瀆，互強盜入去褻瀆。
23「鍊仔著準備好勢！因為逐所在攏有刣人流血的事，逐鄉鎮充滿強暴。
24我欲互上兇惡的民族來佔𪜶的厝，互列國褻瀆𪜶敬拜的所在，互強暴的人𣍐閣聳鬚。
25災禍到啦！𪜶啲求平安，毋拘無平安。
26災難了後閣有災難，歹消息續接歹消息。𪜶尋先知求異象，毋拘無路用；祭司無閣有教導，長老嘛𣍐當給人民指導。
27國王悲傷，領袖失望，人民驚甲皮皮惙。我欲照𪜶的行為辦𪜶，照𪜶判斷人的方法給𪜶審判。按呢，𪜶就知我是上主。」
Who We AreWhat We EelieveWhat We Do
2025 by iamachristian.org,Inc All rights reserved.
