詩篇 113 - 現代台語譯本漢字版(TTVH)-闽南语

記念出埃及

1哈利路亞，稱讚上主！

上主的僕人啊，恁著稱讚，

稱讚上主的名。

2願上主的名受稱讚，

對現在到永遠。

3對日出到日落的所在，

上主的名應該受稱讚。

4上主統轄萬國；

伊的榮光比天較高。

5啥人會當及上主 — 咱的上帝比？

伊坐佇至高的所在，

6俯落來看天及地。

7伊對塵埃高升散赤人，

對糞埽堆提拔欠缺的人；

8伊互𪜶陪伴貴族，

及本國的貴族做夥坐。

9伊互𣍐生育的婦仁人有家庭，

做真多兒女的老母來歡喜。

哈利路亞，稱讚上主！