耶利米書 28 - 現代台語譯本漢字版(TTVH)-闽南语

假先知哈拿尼雅

1 西底家王統治猶大第四年五月，基遍人押朔的子先知哈拿尼雅佇上主的聖殿，佇祭司及民眾的面前給我講：

2「上主 — 萬軍的統帥、以色列的上帝按呢講：『我已經摃斷巴比倫王互恁的軛。

3兩年內，我欲將巴比倫王尼布甲尼撒對此塊土地搶去巴比倫的上主聖殿所有的器具，攏搬轉來此個所在；

4閣欲給約雅敬的子猶大王約雅斤及受掠去巴比倫所有的猶大人攏導倒來，因為我欲摃斷巴比倫王的軛。』上主按呢宣布。」

5先知耶利米就佇許個徛佇上主殿內的祭司及民眾的面前，給先知哈拿尼雅講：

6「阿們！願上主會按呢做。願上主實現你講的預言，將上主聖殿的器具及所有受掠去的人，攏對巴比倫帶倒來此個所在。

7今，你著注意聽我欲對你及民眾講的話。

8對古早以來，你我以前的先知攏曾對真多地區及強大的國家預言會發生戰爭、災禍、瘟疫。

9許個預言平安的先知著愛到𪜶的話實現的時，人才會承認𪜶真正是上主差派來的先知。」

10 哈拿尼雅就將耶利米頷頸的軛提起來，給伊摃斷。

11伊閣對所有的民眾講：「上主按呢講：『兩年內，上主欲親像按呢，給巴比倫王尼布甲尼撒下佇列國頷頸的軛摃斷。』」耶利米就離開遐。

12先知哈拿尼雅給先知耶利米頷頸頂面的軛摃斷了後，上主的話臨到耶利米，講：

13「你著去給哈拿尼雅講：『上主按呢講：你摃斷柴做的軛，毋拘上主會做鐵的軛來代替。

14因為上主 — 萬軍的統帥、以色列的上帝按呢講：我欲將鐵的軛下佇列國的頷頸，互𪜶服事巴比倫王尼布甲尼撒；𪜶一定著服事伊，因為連野外的動物我都交互伊管理。』」

15先知耶利米閣給先知哈拿尼雅講：「哈拿尼雅，著注意聽！上主無差派你，你竟然互諸個人民相信你的白賊話。

16所以，上主按呢講：『我欲互你離開世間；今年你一定會死，因為你煽動人背叛上主。』」

17彼年七月，哈拿尼雅就死。