羅馬書 13 - 現代台語譯本漢字版(TTVH)-闽南语

對政府的責任

1逐個人著順服佇頂面的權柄，因為權柄攏是對上帝來。掌權者的權柄攏是上帝制定的。

2所以，反抗權柄是違背上帝所制定的制度；反抗的人會受審判。

3統治者毋是欲互作好的人驚惶，是欲互作歹的人驚惶。你豈無愛做一個免驚有權柄的人？若愛，著作好，你就會得著稱讚；

4因為伊是上帝的差用，伊的職責是欲幫贊你。毋拘你若作歹，著驚伊，因為伊帶劍毋是無目的。伊是上帝的差用，是申冤者，欲替上帝刑罰作歹的人。

5所以，恁著順服，毋是干焦因為驚上帝受氣，嘛是為著良心的緣故。

6恁納稅嘛是為著此個理由，因為伊是服事上帝的人，啲執行伊的職務。

7著對眾人盡恁的義務；恁欠的，著還；應該納的，著納；應該驚畏的，著驚畏；應該尊敬的，著尊敬。

對別人的責任

8互相相疼的債以外，絕對毋通欠人什麼；因為疼別人的，已經有完成律法的要求。

9律法的要求是：「毋通姦淫；毋通害死人；毋通偷提；毋通貪心。」諸個及其他的要求攏包含佇「著疼厝邊親像疼家己」此句話。

10疼厝邊的人𣍐傷害別人。所以，疼成全律法。

11按呢，恁知此個時陣是恁應該睏醒的時，因為現在比咱抵抵信的時閣較接近拯救。

12暝時已經深，日時啲欲到。所以，咱著褪掉烏暗的行為，穿光明的裝備。

13咱的行為著端正，親像佇日時啲生活。毋通放縱，酒醉；毋通好色，放蕩；毋通相爭，怨妒。

14著穿主耶穌基督裝備家己；毋通只有圖謀肉體的事來滿足私慾。