詩篇 137 - 現代台語譯本漢字版(TTVH)-闽南语

俘虜的哀歌

1阮坐佇巴比倫的河邊，

一下想著錫安，目屎就流。

2阮將琴

吊佇遐的柳樹。

3佇遐，掠阮的人叫阮唱歌；

苦楚阮的人愛阮互𪜶快樂，

講：「給阮唱一條錫安的歌。」

4阮佇異邦

哪唱會出敬拜上主的詩歌？

5 耶路撒冷啊，我若𣍐記得你，

著互我的正手瘸去，𣍐彈琴。

6我若𣍐記得你，

若無看耶路撒冷做我的第一歡喜，

著互我的舌黏佇頂顎𣍐唱歌。

7 耶路撒冷淪陷的日，

以東人講：「給伊拆毀！給伊拆毀！

給伊拆到地基！」

上主啊，求你會記得彼日。

8 巴比倫城啊，你應該受毀滅！

你按怎對待阮，

許個照按呢對待你的人有福氣。

9掠你的嬰仔摔佇石磐頂

彼款人有福氣。