撒迦利亞書 13 - 現代台語譯本漢字版(TTVH)-闽南语

1佇彼日，欲為著大闢的後代及耶路撒冷的住民開一個水泉，通洗除𪜶的罪惡及垃墋。

2上主 — 萬軍的統帥講：「佇彼日，我欲對此個地除去偶像的名，互人𣍐閣記得𪜶；我嘛欲對此個地除去先知及污穢的神。

3若有人猶欲講預言，伊的父母會給伊講：『你該死，因為你奉上主的名講白賊。』伊若繼續講，伊的親生父母會給伊鑿死。

4佇彼日，逐個假先知會因為所看見的異象感覺見笑，𣍐閣穿先知衫騙人；

5伊會講：『我毋是先知，是農夫，一世人作穡。』

6人若問伊：『你身軀哪有傷？』伊會應講：『是佇阮朋友𪜶兜受的傷。』」

7上主 — 萬軍的統帥講：

「刀劍啊，醒起來，攻擊我的牧者，

攻擊我的同伴。

拍牧者，羊群就四散。

我欲越轉身攻擊細隻羊仔。」

8上主講：

「此個地三分二的人會受消滅，

三分一會留啲。

9我欲互此三分一的人受火鍛鍊，

親像啲煉金，煉銀。

𪜶會求叫我的名，

我欲應𪜶。

我欲講『恁是我的子民』；

𪜶會應：『上主，你是阮的上帝！』」