以斯帖記 1 - 現代台語譯本漢字版(TTVH)-闽南语

亞哈隨魯王廢王后華實蒂

1-2此個事發生佇亞哈隨魯王的時代。亞哈隨魯佇書珊王宮坐位，統治一百二十七省，對印度到古實。

3伊坐位第三年，辦桌請所有的領袖及人臣；波斯及米底亞的將領、貴族，及逐省的領袖攏來參加。

4伊用一百八十日互𪜶看王國的富裕、強盛，及伊極大的尊貴。

5後來，王閣為著住佇書珊城的住民，無論尊貴卑賤，佇王宮的花園辦桌七日。

6會場有白色、藍色的布簾，用幼麻及紫色的索縛佇大理石柱的銀環；有金銀做的撐椅，排佇用紅、白、黃、烏的石仔鋪的地面。

7王供應真多酒，用逐種無仝款的金杯互人飲。

8王命令宮內所有的人臣，酒出在人飲，毋通限制。

9王后華實蒂佇亞哈隨魯王的宮內嘛辦桌請婦女。

10到第七日，王飲酒飲甲真快樂，就命令啲侍候伊彼七個太監米戶幔、比斯他、哈波拿、比革他、亞拔他、西達，及甲迦，

11去請王后華實蒂戴王后的花冠來王的面前；因為王后真媠，王愛欲給許個人民及人臣展伊的美貌。

12毋拘王后華實蒂毋肯來，毋照太監所傳王的命令，所以，王非常受氣，心內親像火啲𤏸。

13王有一個慣例，關係法令及裁決的事，會代先及許個識時事有智慧的人參詳。

14彼時佇王的左右，常常及伊見面的，有波斯及米底亞七個大臣，甲示拿、示達、押瑪他、他施、米力、瑪西拿、米慕干。

15王問𪜶講：「王后華實蒂無遵趁太監所傳我亞哈隨魯王的命令，今照咱的法令著按怎辦伊？」

16 米慕干佇王及許個大臣的面前回答講：「王后華實蒂的所做毋若得罪王，嘛得罪亞哈隨魯王逐省的官員及所有的人民；

17因為王后所做的事，會傳到全國的婦女，𪜶會講：『亞哈隨魯王召王后華實蒂去王的面前，毋拘伊拒絕。』按呢，𪜶會有樣看樣藐視家己的丈夫。

18今仔日波斯及米底亞眾官員的夫人聽著王后的所做，嘛會像款按呢對待𪜶的丈夫，就會引起真多藐視及受氣。

19王若看做妥當，請下令寫做波斯及米底亞𣍐當改變的法令，不准華實蒂閣見亞哈隨魯王的面；嘛請王將王后的位賜互比伊較好的人。

20王的法令一下宣布，即呢大的國家逐所在的婦女，無論𪜶的丈夫尊貴抑是卑賤，攏會尊敬家己的丈夫。」

21王及許個大臣攏看米慕干的話做妥當；王就接受伊的建議。

22王的詔書用逐省的文字、逐民族的語言發布，互無論講什麼語言的人，丈夫佇家內做主。