羅馬書 14 - 現代台語譯本漢字版(TTVH)-闽南语

毋通批判人

1信心軟弱的人著給伊接納，毋通及伊辯論有爭議的事。

2信心堅強的人信逐項攏通食，毋拘軟弱的人只有食菜蔬。

3逐項食的人毋通看輕無逐項食的人；無逐項食的人嘛毋通批判逐項食的人，因為上帝已經有接納伊。

4你算啥，哪敢批判別人的僕人？伊做了好抑是無好，伊的主人會給伊審判。伊會做好勢，因為主會給伊幫贊。

5有人看此日比彼日較重要；嘛有人看逐日平平重要。逐個人著有家己明確的見解。

6守特別日子的人是為著主來守；有食肉的人嘛是為著主來食，因為伊有感謝上帝。無食肉的人是為著主無食，伊嘛是有感謝上帝。

7咱無人為著家己啲活，嘛無人為著家己來死。

8咱若活，是為著主啲活；若死，嘛是為著主來死。所以，無論活抑是死，咱攏是屬主的人。

9為著此個目的基督有死，嘛有閣活，通像時做死人及活人的主。

10按呢，是按怎你啲批判你的兄弟抑是姊妹？是按怎啲看輕你的兄弟抑是姊妹？因為咱眾人攏著徛佇上帝的審判台前。

11聖經有記載：

主講：我是永活的上帝；

逐個腳頭窩會給我跪拜，

逐個嘴會宣認我是上帝。

12按呢，咱逐個人著將家己的代誌佇上帝的面前交代清楚。

毋通互信徒的信仰受阻礙

13所以，咱毋通閣再互相批判，反轉著決心無做互兄弟抑是姊妹的信仰受阻礙，跋倒的事。

14我知，閣主耶穌互我確信，逐項物本身攏清氣；人若想講無清氣，對彼個人來講彼項物就無清氣。

15你若因為所食的物互兄弟抑是姊妹心艱苦，你的行為就毋是出佇疼心。你毋通為著家己所食的物互兄弟抑是姊妹致到滅亡，因為基督已經為著𪜶死。

16所以，毋通互恁看做好的成做人的誹謗。

17上帝主權的實現毋是靠飲食，是靠聖神所賜的公義、和平，及歡喜。

18用按呢來服事基督的人會互上帝歡喜，嘛會得著人的稱讚。

19所以，咱著追求和睦及互相造就的事。

20毋通為著食物破壞上帝的工作。萬物攏清氣，毋拘人若因為食物互別人的信仰受阻礙就毋好。

21較好是無食肉，無飲酒，無做互兄弟抑是姊妹失去信仰的代誌。

22你對一項事的信念是你及上帝中間的代誌。對家己看做著的事無自責的人真有福氣。

23毋拘心有憢疑來食的人會受定罪，因為毋是出佇信心。毋是出佇信心來做的攏是罪。