1上主對摩西講：
2「你著吩咐以色列人，逐支族的首領攏著攑𪜶的柺仔來，攏總十二支。你著佇𪜶的柺仔寫𪜶的名。
3利未支族彼支柺仔著寫亞倫的名；因為逐支族的族長攏有一支柺仔。
4你著將許個柺仔提來會幕，下佇約櫃的頭前，就是我及恁相會的所在。
5我所揀彼個人，伊的柺仔會茁芽；按呢我欲互以色列人𣍐閣埋怨恁。」
6 摩西將諸個話給以色列人講，逐個支族的首領就將𪜶的柺仔交互摩西；一個支族一支，共十二支；亞倫的柺仔嘛佇彼中間。
7摩西就將許個柺仔提入去囥約櫃的帳幕內面，下佇上主的面前。
8隔日，摩西入去囥約櫃的帳幕，看著利未支族亞倫的柺仔已經茁芽，生花莓，開花，結杏仁。
9摩西對上主的面前攑許個柺仔出來，去以色列的眾人遐，互𪜶看；逐個族長就去攑家己的柺仔。
10上主對摩西講：「將亞倫的柺仔囥倒去約櫃面前，做諸個背逆的人的鑑戒。按呢𪜶就𣍐閣對我發怨言，嘛𣍐因為按呢來死。」
11摩西就照上主的命令做。
12 以色列人對摩西講：「慘啊！阮會死，會滅亡，阮會死了了。
13所有倚近上主的會幕的攏會死。按呢，阮穩死的！」
Who We AreWhat We EelieveWhat We Do
2025 by iamachristian.org,Inc All rights reserved.
