1咱所聽著的，啥人會相信？
上主的氣力曾對啥人顯示？
2上主互伊的僕人親像新的芛茁出來，
親像根對焦地發出來。
伊無好形狀，無威儀通吸引咱，
嘛無好看的外貌互咱通欣慕。
3伊互人看輕，受人棄拺，
閣受真多苦難，經歷逐款病疼。
人越頭毋看伊；
咱藐視伊，無給尊重。
4伊確實承擔咱的病疼，
擔當咱的苦難。
咱想講伊受責罰，
互上帝拍，受苦楚。
5毋拘伊是為著咱的過失受傷害，
為著咱的罪過受硩碎。
伊擔當刑罰，咱得著平安；
伊受鞭拍，咱得著醫好。
6咱攏親像羊迷路；
逐個人行家己的路。
上主將咱眾人的罪
攏歸佇伊身上。
7伊受壓迫，受苦楚，
毋拘伊恬恬無出聲；
伊親像羊羔互人牽去刣，
親像羊母互人剪毛，
伊攏無出聲。
8伊受無公道的審判，互人掠去；
豈有人關心伊的遭遇？
伊為著我子民的罪過受鞭拍；
伊受處死，對人間消失。
9雖然伊無用暴力，
無講詭詐的話，
人將伊及歹人埋做堆，
及好額人埋做夥。
10總是上主決意互伊受硩碎，受苦楚，
互伊通獻性命贖人的罪。
伊會長歲壽，看著子子孫孫，
互上主的旨意通過伊來實現。
11經歷受苦，伊會看見光。
對伊的體驗，伊會心滿意足。
我義的僕人會互真多人成做義人；
伊欲擔當𪜶的罪過。
12所以，我欲互伊及有地位的人分所得著的份額，
及強猛的人分戰利品。
因為伊甘願放拺性命到死，
互人列入罪犯的名單。
總是伊擔當真多人的罪，
閣替罪犯祈禱。
Who We AreWhat We EelieveWhat We Do
2025 by iamachristian.org,Inc All rights reserved.
