詩篇 65 - 現代台語譯本漢字版(TTVH)-闽南语

大闢的詩，交互聖樂長。稱讚上帝的救恩

1上帝啊，人應該佇錫安稱讚你，

對你謝所下的願。

2聽祈禱的主啊，

全人類攏欲就近你。

3罪壓倒我；

毋拘阮的過失你攏欲赦免。

4你所揀選，互𪜶親近你，住佇你殿的埕的人真有福氣！

阮欲因為你的厝，你的聖殿的福氣心滿意足！

5拯救阮的上帝啊，

你用通驚畏的作為，施行公義來應答阮；

地極及海面遠遠的人攏欲倚靠你。

6你彰顯你的權能，

用氣力互山嶺安穩徛在。

7海搖泏，海湧嘩嘩哮，萬民哄喝，

你互𪜶攏平靜。

8徛起佇地盡頭的人會因為你的神跡驚畏；

日出日落的所在，你互𪜶歡呼。

9你眷顧土地，落雨灌沃，互土地真肥。

上帝的河，水滿滿；

你按呢準備土地，供給五穀。

10你灌沃田園，

互水滿溝滿稜，

互土肉軟軟。

你賜福互所栽種的攏大欉。

11你用豐收做年冬的王冠；

你經過的路有油啲滴，

12連曠野的草埔都有油啲滴。

山頭用歡喜做帶縖，

13草埔有羊群做衫穿，

山谷有五穀做外套幔；

𪜶攏歡喜出聲吟詩。