約翰福音 20 - 現代台語譯本漢字版(TTVH)-闽南语

空墓(太 28.1-8；可 16.1-8；路 24.1-12)

1禮拜日透早，天猶未光，末大拉的馬利亞去墓地，看著墓口的石已經徙開。

2伊就走去尋西門‧彼得，閣去尋耶穌所疼彼個門徒，給𪜶講：「有人將主對墓裡徙走；阮毋知𪜶給伊囥佇叨位。」

3 彼得及彼個門徒就去墓地。

4兩個人做夥走，彼個門徒比彼得走較緊，先到墓裡。

5伊俯落去看墓內，看著幼麻布囥佇遐，不過無入去。

6西門 彼得隨後嘛到，入去墓內。伊看著幼麻布囥佇遐，

7嘛看著包紮耶穌頭殼的巾無及幼麻布囥做夥，捲啲，另外囥。

8先到墓彼個門徒嘛入去，看了就信。

9𪜶猶未了解聖經的話，講伊一定著對死人中閣活。

10然後，彼兩個門徒轉去𪜶兜。

耶穌對末大拉的馬利亞顯現(太 28.9-10；可 16.9-11)

11 馬利亞徛佇墓外啲哭。伊那哭那俯落去看墓內，

12看著兩個穿白衫的天使坐佇原來下耶穌的遺體的所在，一個佇頭此旁，一個佇腳彼旁。

13𪜶問伊講：「婦仁人，你哪啲哭？」

伊應講：「有人給我的主徙走，我毋知𪜶給伊囥佇叨位。」

14講煞，馬利亞越轉身，看著耶穌徛佇遐，毋拘毋知伊是耶穌。

15耶穌問伊：「婦仁人，你哪啲哭？你啲尋什麼人？」

馬利亞想做伊是顧園的，就應講：「頭家，你若有給伊徙走，請給我講你給伊囥佇叨位，我通去給伊收轉來。」

16耶穌給伊叫：「馬利亞！」

馬利亞越轉身，用希伯來話叫耶穌：「拉波尼！」意思就是「老師」。

17耶穌給伊講：「毋通給我擒啲，因為我猶未上去父遐。你著去給我的兄弟講：『我欲上去我的父，嘛是恁的父，我的上帝，嘛是恁的上帝遐。』」

18 末大拉的馬利亞就去給門徒報告講「我已經見著主」；閣講主有給伊講諸個話。

耶穌對門徒顯現(太 28.16-20；可 16.14-18；路 24.36-49)

19仝彼個禮拜日暗時，門徒聚集的所在門攏關啲，因為𪜶驚猶太人的領袖。耶穌來，徛佇𪜶中央，對𪜶講：「願恁平安！」

20伊講了，將雙手及脇下互𪜶看。門徒看著主，真歡喜。

21耶穌閣給𪜶講：「願恁平安！親像父有差我，我嘛差恁。」

22講煞，伊對𪜶歕氣，講：「領受聖神！

23恁赦免什麼人的罪，𪜶就得著赦免；恁無赦免什麼人的罪，𪜶就無得著赦免。」

耶穌對多馬顯現

24 多馬，嘛叫做雙生仔，伊是十二使徒的一個，耶穌來彼時無及𪜶做夥佇遐。

25所以其他的門徒給伊講：「阮已經見著主啦。」

多馬給𪜶講：「我若無看著伊手中的釘跡，用指頭仔摸釘跡，閣用手摸伊的脇下，我絕對毋信。」

26一禮拜後，門徒閣聚集佇厝內，多馬嘛及𪜶做夥。門關啲，耶穌來，徛佇𪜶中央，講：「願恁平安！」

27然後，伊給多馬講：「伸指頭仔來遮，探我的手；伸手來摸我的脇下。毋通無信，著信！」

28 多馬講：「我的主，我的上帝！」

29耶穌給伊講：「你看著我才信噢？無看著來信的人真有福氣！」

此本冊的目的

30耶穌佇門徒的面前猶行真多神跡，無記載佇此本冊。

31記載諸個是欲互恁信耶穌是基督，是上帝的子，閣互恁通過信，靠伊的名得著活命。